حیدرآباد 31اگست(یواین آئی ) سابق صدر جمہوریہ پرنب مکرجی کی برسی پرصدر تلنگانہ پردیش کانگریس مہیش کمارگوڑ نے انہیں خراج عقیدت پیش کیا ۔ انہوں نے کہاکہ پرنب مکرجی نے نصف صدی سے زائد عرصہ تک ملک کی سیاست میں نمایاں خدمات انجام دیں۔ وہ کئی بار مرکزی کابینہ میں اہم عہدوں پر فائز رہے اور اپنی بصیرت و قابلیت کے ذریعہ ملک کی سیاست میں ایک منفرد مقام بنایا۔ ان کی طویل سیاسی خدمات اور ملک کے لئے کی گئی قربانیوں کو ہمیشہ یاد رکھا جائے گا۔ مہیش کمار گاڈ نے کہا کہ پرنب مکرجی ایک عظیم مدبر، رہنما اور جمہوری قدروں کے علمبردار تھے ۔ وہ نہ صرف کانگریس پارٹی بلکہ پورے ملک کے لئے ایک انمول سرمایہ تھے ۔ مہیش کمار گوڑ نے کہا کہ ان کی خدمات آئندہ نسلوں کیلئے مشعلِ راہ ہیں۔ ٹی پی سی سی سوشیل میڈیا وِنگ سے جاری خصوصی پوسٹر میں بھی پرنب مکرجی کی خدمات کو یاد کیا گیا اور انہیں بھرپور انداز میں خراج عقیدت پیش کیا گیا۔
