نئی دہلیَ:ملک کے موجودہ حالات کو لے کر کانگریس پارٹی کے سابق صدر راہول گاندھی نے مرکز کی مودی حکومت پر شدید تنقید کی ہے۔ انھوں نے کہا کہ بی جے پی۔آر ایس ایس کی تاریخ ہی نفرت پھیلانے والی رہی ہے۔ راہول گاندھی نے کہا کہ ملک کو نفرت کی آگ میں جھونک کر ہاتھ سینکنے والی بی جے پی اور آر ایس ایس کی اس کرتوت کو اب پورا ہندوستان جانتا ہے۔ انھوں نے بی جے پی اور آر ایس ایس کا موازنہ غدارِ وطن سے کیا۔انہوں نے کہا کہ یہ غدارِ وطن چاہے جتنا توڑنے کا کام کر لیں، کانگریس اس سے زیادہ ہندوستان جوڑنے کا کام کرتی رہے گی۔‘‘واضح رہے کہ جمعہ کو سپریم کورٹ نے بی جے پی کی معطل لیڈر نپور شرما کے تبصرہ پر زبردست پھٹکار لگائی تھی۔ عدالت نے کہا تھا کہ نپور شرما نے اپنے غیر ذمہ دارانہ بیان سے ملک بھر میں لوگوں کے جذبات کو مشتعل کیا ہے۔ ان کے بیان نے ملک میں آگ لگا دی ہے۔ آج ملک میں جو ماحول بگڑا ہوا ہے، اس کے لیے وہ واحد ذمہ دار ہے۔ ادے پور میں ہوا قتل بھی ان کے ایسے ہی بیان کا نتیجہ ہے۔ بحث مین انھیں اکسانے کی کوشش ہوئی، لیکن اس کے بعد انھوں نے جو کچھ کہا، وہ شرمناک ہے۔ انھیں پورے ملک سے معافی مانگنی چاہیے۔عدالت عظمیٰ کے اس تبصرہ کے بعد اپوزیشن پارٹیاں لگاتار بی جے پی کو تنقید کا نشانہ بنا رہی ہیں۔ نوبل انعام یافتہ امرتیہ سین نے بھی جمعہ کو ملک کے موجودہ حالات پر فکر کا اظہار کرتے ہوئے کہا تھا کہ لوگوں کو مذہبی بنیاد پر تقسیم نہیں کیا جانا چاہیے، بلکہ سب میں اتحاد بنائے رکھنے کے لیے کام کرنا چاہیے۔ امرتیہ سین نے یہ بھی کہا تھا کہ ’’مجھے لگتا ہے کہ اگر مجھ سے کوئی پوچھے گا کہ کیا مجھے کسی چیز سے ڈر لگتا ہے؟ میں کہوں گا، ہاں۔ ڈرنے کی ایک وجہ ہے۔ ملک کے موجودہ حالات ڈر کی وجہ بن گئے ہیں۔‘
