فقید المثال انتظامات ، شرکاء کی کثیر تعداد میں آمد
حیدرآباد /5 جنوری ( سیاست نیوز ) تلنگانہ کے وقارآباد ضلع کے پرگی میں ہفتہ کو صبح فجر سے شروع ہونے والے تبلیغی جماعت کے سہ روزہ اجتماع میں تلنگانہ کے علاوہ ملک کی مختلف ریاستوں سے شرکاء کی آمد کا سلسلہ شروع ہوگیا ہے ۔ پرگی کے قریب نعمت نگر میں یہ اجتماع 6 سے 8 بروز ہفتہ ، اتوار اور پیر تک منعقد ہونے جارہا ہے ۔ شرکاء کیلئے فقید المثال انتظامات کئے گئے ہیں ۔ جس میں ایک اندازہ کے مطابق 5 لاکھ سے زائد افراد کی شرکت متوقع ہے ۔ اسی مناسبت سے تمام کے رہنے کیلئے عارضی خیمے قائم کئے گئے ہیں اور ساتھ ہی ساتھ ان کے طعام کا بھی خصوصی انتظام کیا گیا ہے ۔ یہی نہیں بلکہ پانی کے دو عارضی ذخیرہ آب تیار کئے گئے ہیں جس میں ایک ایک کروڑ لیٹر پانی ذخیرہ کیا گے ہے تاکہ شرکاء کو کسی طرح کی مشکل درپیش نہ ہو ۔ مصلیوں کیلئے وضوگاہ کی تعمیر عمل میں لائی گئی ہے ۔ مشن بھگیرتا اور ریاستی حکومت کے دیگر محکموں نے اس ذخیرہ آب اور وضوخانہ کے علاوہ بیت الخلاؤں کی تعمیر میں مدد کی ہے ۔ اس سلسلے میں حکومت نے ڈھائی کروڑ روپئے جاری کئے ۔ اجتماع کیلئے مختلف مقامات سے وفود کی آمد کا سلسلہ شروع ہوچکا ہے ۔ معروف علمائے کرام بھی شرکت کریں گے ۔ تربیتی اجتماع میں عوام کی کثیر تعداد کے پیش نظر انتظامات کئے جارہے ہیں اور کوشش اس بات کی ہو رہی ہے کہ شرکاء کو کسی طرح کی تکلیف نہ ہو ۔ تبلیغی جماعت کے ذمہ داران پروگرامس سے خطاب کریں گے ۔ آخری دن پیر 8 جنوری کو بعد نماز ظہر خصوصی رقت انگیز دعاؤں کے ساتھ اختتام کو پہونچے گا ۔