حیدرآباد۔11جولائی (سیاست نیوز) ضلع وقار آباد میں تبلیغی جماعت کا اجتماع 28 تا 30 اکٹوبر منعقد ہوگا اور اس کیلئے ذمہ داران تبلیغی جماعت کی جانب سے مختلف اجازت ناموں کیلئے چیف منسٹر چندر شیکھر راؤ سے اجازت کے حصول اور محکمہ برقی ‘ آبرسانی ‘ پولیس‘ بلدیہ اور دیگر محکمہ جات کیلئے ہدایات کی درخواست پیش کرنے کا فیصلہ کیا تھا لیکن چیف منسٹر کے سی آر نے از خود کہا کہ اس اجتماع کی تمام تر تیاریاں حکومت کی جانب سے کی جائیں گی ۔ ذرائع کے مطابق حکومت کی جانب سے اجتماع کیلئے بس سہولت کے علاوہ دیگر محکمہ جات سے سہولتوں کو یقینی بنانے احکامات کی اجرائی عمل میں لائی جائے گی۔ جناب محمد محمود علی وزیر داخلہ نے بتایا کہ پرگی میں ہونے جا رہے اجتماع کیلئے حکومت نے تمام تر ذمہ داریاں اپنے طور پر قبول کرنے کا فیصلہ کیا ہے اور اجتماع گاہ کے قریب بنیادی سہولتوں کی فراہمی و نظم و نسق کی بہتری اور دیگر اقدامات کیلئے جلد جائزہ اجلاس منعقد کرکے انتظامات کا آغاز کردیا جائے گا۔م
