نئی دہلی: شیوسینا رکن راجیہ سبھا پرینکا چترویدی کے بعد کانگریس کے لوک سبھا رکن ششی تھرور نے راجیہ سبھا اراکین کی معطلی کیخلاف احتجاج میں سنسد ٹی وی پر ’ٹو دی پوائنٹ‘ پروگرام کے ’ہوسٹ‘ کے فرائض سے خود کو الگ کرلیا ۔ انہوں نے ایک بیان دیا کہ وہ معطلی کی مخالفت کررہے اراکین کے ساتھ ہیں اورسنسد ٹی وی پر ’ٹو دی پوائنٹ‘ پروگرام کے ہوسٹ کے فرائض سے خود کو الگ کر رہے ہیں۔ وہ اس پروگرام سے اس وقت تک دور رہیں گے جب تک 12 اراکین کی معطلی واپس نہیں ہوتی اورایوان اور سنسد ٹی وی کے کام میں ہم آہنگی کی فضا بحال نہیں ہوجاتی۔ انہوں نے کہا ہے کہ سنسد ٹی وی بھی اس مسئلے کا حصہ بن گیا ہے۔ بہت سے لوگوں نے تبصرہ کیا ہے کہ ایوان میں سنسد ٹی وی کا کیمرہ اپوزیشن ارکان کو نظر انداز کرتا ہے ۔
تھرور نے کہا کہ ’ٹو دی پوائنٹ‘ کے ہوسٹ کا کردار ان کے لیے فخر کی بات ہے اور انھوں نے اس کردار کو ہندوستان کی پارلیمانی جمہوریت کی بہترین روایات کے مطابق قبول کیا تھا ، جس میں حکمران اور اپوزیشن دوںوں جماعتوں اراکین سیاسی اختلافات کے باوجود پارلیمانی اداروں میں مل کر کام کرتے ہیں ۔