نئی دہلی: کانگریس جنرل سکریٹری پرینکا گاندھی واڈرا نے اتر پردیش میں پیپر لیک ہونے کے ایک اور واقعے کا حوالہ دیتے ہوئے جمعہ کے روز الزام لگایا کہ بی جے پی امتحانی مافیا اور بدعنوانوں کو بچانے کے لیے کروڑوں نوجوانوں کی بنیاد کھوکھلی کر رہی ہے۔ انہوں نے 12ویں جماعت کے ریاضی اور بیالوجی کے سوالیہ پرچے مبینہ طور پر امتحان سے پہلے ہی واٹس ایپ پر شیئر کیے جانے کے واقعے کا ذکر کیا۔پرینکا گاندھی نے سوشل میڈیا پلیٹ فارم‘X’پر پوسٹ کیاکہ ایک بار پھر پیپر لیک ہو گیا! آخر کیوں؟ بی جے پی کے دور میں نوکری کے امتحانات سے لیکر بورڈ کے امتحانات تک تقریباً ہر پیپر لیک ہو رہا ہے۔بورڈ کے امتحانات وہ پہلا چیلنج ہوتے ہیں جن کا سامنا بچوں کو اس وقت ہوتا ہے جب وہ اپنا مستقبل بنانا سیکھتے ہیں۔ اگر یہیں پر ان کے ساتھ اتنا بڑا دھوکہ ہو جائے گا تو وہ آگے کیا کریں گے؟انہوں نے الزام لگایا کہ امتحانی مافیا اور حکومت میں بیٹھے بدعنوان لوگوں کو بچانے کے لیے بی جے پی کروڑوں بچوں اور نوجوانوں کی بنیاد کھوکھلی کر رہی ہے۔
