ریاست کی بی جے پی حکومت میں سیاسی ہلچل ، چیف منسٹر کی تبدیلی پر کانگریس کی تنقید
دہرادون :اترا کھنڈ میں بی جے پی حکومت میں زبردست ہلچل کے بعد آج تیرتھ سنگھ راوت کے جگہ پشکرسنگھ دھامی کو چیف منسٹر بنادیا گیا ہے ۔اتراکھنڈ کے نئے نامزد چیف منسٹر پشکر سنگھ دھامی نے گورنر بے بی رانی موریہ سے ملاقات کر کے انہیں قانون ساز پارٹی کا لیڈر منتخب کیے جانے کی اطلاع دے دی ہے۔ میڈیا ذرائع سے موصول ہو رہی خبروں کے مطابق دھامی 4 جولائی کی شام تقریباً 6 بجے چیف منسٹر کے عہدہ کا حلف لیں گے۔نئی کابینہ کو بھی حلف دلایا جائے گا۔ قابل ذکر ہے کہ کھٹیما اسمبلی حلقہ سے دو بار رکن اسمبلی رہ چکے دھامی کے نام کی تجویز قانون ساز پارٹی کی میٹنگ کے دوران تیرتھ سنگھ راوت نے رکھی تھی۔ راوت نے آئینی بحران سے بچنے کے لیے 2 جولائی کی شب گورنر کو اپنا استعفیٰ نامہ سونپ دیا تھا۔اتراکھنڈ میں تیرتھ سنگھ راوت کے استعفی کے بعد آج منعقد ہ قانون ساز پارٹی کے اجلاس کے دوران پشکر سنگھ دھامی کو قانون ساز پارٹی کا نیا قائد منتخب کر لیا گیا ہے۔ اس طرح چار مہینے کے بعد ہی ریاست کو ایک نیا چیف منسٹر مل گیا ہے۔اتراکھنڈ کے چیف منسٹر کی حیثیت سے تیرتھ سنگھ راوت کی جانب سے عہدے سے استعفی دینے کے بعد بی جے پی کی جانب سے آج قانون ساز پارٹی کا اجلاس طلب کر لیا گیا ہے۔ پارٹی کے دہرادون میں واقعہ ریاستی دفتر میں منعقد ہونے والے اس اجلاس میں شرکت کے لئے مرکزی وزیر زراعت نریندر تومر بھی دہرادون پہنچ گئے۔ چیف منسٹر کے عہدے سے استعفی دینے والے تیرتھ سنگھ راوت نے دعویٰ کیا ہے کہ اتراکھنڈ کے آئندہ 2022 میں ہونے والے اسمبلی انتخابات میں جیت بی جے پی کی ہوگی۔ خیال رہے کہ تیرتھ سنگھ کے استعفیٰ دینے کے بعد نئے چیف منسٹر کے کے لئے اتراکھنڈ کی راجدھانی دہرادون میں سیاسی ہلچل تیز ہو گئی۔ اتراکھنڈ کے سابق چیف منسٹر تریویندر سنگھ راوت نے تیرتھ سنگھ راوت کے استعفیٰ پر وضاحت پیش کی ہے۔ انہوں نے کہا کہ ’’اگر وہ (تیرتھ سنگھ راوت) استعفی نہیں دیتے تو اس سے آئینی بحران کھڑا ہو جاتا۔ کچھ ریاستوں میں ضمنی انتخابات کورونا کی وجہ سے تاخیر کا شکار ہو گئے ہیں۔خود کے وزیر اعلیٰ کی دوڑ میں شامل ہونے کے سوال پر تریویندر سنگھ راوت نے کہا، ’’میں کبھی دوڑ کا حصہ نہیں رہا۔اتراکھنڈ میں سال 2022 میں ہونے والے اسمبلی انتخابات کے تعلق سے بات کرتے ہوئے بی جے پی رکن پارلیمنٹ اجے بھٹ نے کہا، ’’بی جے پی عوام کی حفاظت اور بہتری سے کبھی سمجھوتہ نہیں کرتی۔ پہلے قوم، پھر پارٹی اور آخر میں ہمارا مقصد آتا ہے۔ ہم کانگریس سے زیادہ سیٹیں حاصل کریں گے۔ ریاستی بی اے پی کے صدرمدن کوشک نے کہا، ’’الیکشن کمیشن کو الیکشن کرانے میں کوئی مسئلہ نہیں ہے لیکن کورونا کی وجہ سے یہ صحیح نہیں ہے۔ ایسے حالات میں استعفی پیش کرنا ہی بہتر تھا۔‘‘6 ماہ کے مختصر عرصے میں بی جے پی حکومت میں چیف منسٹر کی تبدیلی پر اپوزیشن کانگریس نے شدید تنقید کی ہے ۔ سابق چیف منسٹر ہریش راوت کا کہنا ہے کہ اتنے کم عرصہ میں چیف منسٹر کی تبدیلی ریاست کے عوام کی توہین کے مترادف ہے ۔ اتراکھنڈ کی 20 سالہ تاریخ میں پشکر سنگھ دھامی 11 ویں چیف منسٹر ہوں گے ۔ ریاست میں آئندہ سال ریاستی انتخابات منعقد ہونے والے ہیں ۔
