نئی دہلی ۔28 اپریل ۔(سیاست ڈاٹ کام) بی جے پی کے ترجمان ظفر الاسلام نے کہا کہ تبلیغی جماعت کے صحتیاب کورونا متاثرین کی طرف سے کورونا کے دیگر متاثرین کو اس وبا کی زد سے باہر نکالنے کیلئے اپنی مرضی سے اپنا پلازما دینے کا فیصلہ عین اسلامی تعلیم کی ترجمانی کرتا ہے ۔انہوں نے کہا کہ کورونا کی زد میں آنا مکمل طور پر کسی کے ہاتھ میں نہیں ہے لیکن اپنا خون پلازما عطیہ کرنا مکمل طور پر متاثرین کا اپنا فیصلہ ہے ۔ انہوں نے کہا کہ تبلیغی جماعت والوں کے اس قابل ستائش قابل اقدام کو تسلیم کرنا چاہئے جنہوں نے اپنی مرضی سے اپنا پلازما عطیہ کیا۔ اس سے دوسروں کو بھی ایسا کرنے کی ترغیب ملے گی۔انہوں نے اس اقدام کو ملک کے ہر شہری کی جانب سے لائق ستائش قرار دیا۔ظفرنے کہا کہ کرونا کسی کو اس کے رنگ، نسل اور ذات و مذہب کی پہچان کے ساتھ زد میں نہیں لیتا۔