پنت اور دھونی میں بہت بڑا فرق :لارا

   

نئی دہلی۔10 ڈسمبر (سیاست ڈاٹ کام ) ویسٹ انڈیز کے سابق عظیم کرکٹر برائن لارا نے کہا ہے کہ نوجوان وکٹ کیپر رشبھ پنت کا انداز تجربہ کار مہندر سنگھ دھونی سے مختلف ہے اور دونوں کے درمیان کافی فرق ہے، اس لئے پنت کا ان سے موازنہ کر کے ان پر زیادہ دباو بنانا غلط ہے۔ لارا نے ایک پروگرام کے دوران دھونی اور پنت کے درمیان موازنہ پر کہا کہ دونوں بالکل مختلف طرح کے کھلاڑی ہیں۔ تھرو اننت پورم میں ویسٹ انڈیز کے خلاف دوسرے ٹی 20 میچ کے دوران پنت نے ناٹ آوٹ 33 رنز کی اننگز کھیلی تھی لیکن پہلے میچ میں وہ 18 رنز بنا سکے تھے۔ پنت کے کھیل میں تسلسل کے فقدان کی وجہ سے بھی انہیں کافی تنقید کا سامنا کرنا پڑ رہا ہے۔ لارا نے پنت کی حمایت کرتے ہوئے کہا کہ وہ دھونی سے بالکل مختلف کھلاڑی ہیں اور وقت کے ساتھ ان کے کھیل میں تبدیلی آئے گی۔پنت میں کافی جارحیت ہے اور ہندوستانی پرستار چاہتے ہیں کہ دھونی کی جگہ لینے والا کوئی کھلاڑی ہندوستانی ٹیم میں شامل ہو لیکن پنت، دھونی سے بالکل مختلف کھلاڑی ہیں۔انہوں نے کہاکہ ورلڈکپ میں 8 سے 9 ماہ کا ہی وقت رہ گیا ہے اور ایسے میں یہ کسی کھلاڑی کے لیے ٹیم میں جگہ بنانے کے لحاظ سے اہم وقت ہے ۔