نئی دہلی : 28 مئی (ایجنسیز)۔ لکھنؤ سوپر جائنٹس کے کپتان رشبھ پنت کو آئی پی ایل 2025 میں 66 لاکھ روپے کا نقصان ہوا ہے، یہ نقصان انہیں جرمانے کی صورت میں اٹھانا پڑا ہے۔ رشبھ پنت پر27 مئی کو آر سی بی کے خلاف کھیلے گئے میچ کے بعد آئی پی ایل کے ضابطہ اخلاق کی خلاف ورزی کا قصوروار پائے جانے کے بعد جرمانہ عائد کیا گیا ہے۔ وہ اور ان کی ٹیم ایل ایس جی دراصل سلو اوور ریٹ کے قصوروار پائے گئے ہیں۔ اس سیزن میں یہ تیسرا موقع ہے جب ایل ایس جی کے کپتان رشبھ پنت پرسلو اوور ریٹ پر جرمانہ عائد کیا گیا ہے۔ تیسری مرتبہ اننگز میں سلو اوور ریٹ کے قصوروار پائے جانے کے بعد رشبھ پنت پر 30 لاکھ روپے کا جرمانہ عائد کیا گیا ہے۔ وہ دو مواقع پر سست اوور ریٹ کے قصوروار پائے جانے کے بعد 36 لاکھ روپے کا بقیہ جرمانہ پہلے ہی ادا کرچکے ہیں۔آئی پی ایل 2025 میں 5 اپریل کو ممبئی انڈینز کے خلاف کھیلے گئے میچ میں رشبھ پنت کو پہلی بار سلو اوور ریٹ کا قصوروار پایا گیا۔ پھر چونکہ یہ ان کی پہلی غلطی تھی اس لیے اس پر 12 لاکھ روپے جرمانہ عائدکیا گیا۔ رشبھ پنت پر27 اپریل کو کھیلے گئے میچ میں سلو اوور ریٹ کی وجہ سے آئی پی ایل 2025 میں دوسری بار جرمانہ عائد کیا گیا تھا۔ اتفاق سے یہ میچ بھی ممبئی انڈینزکے خلاف تھا۔ اس میچ میں قصوروار پائے جانے کے بعد رشبھ پنت پر 24 لاکھ روپے کا جرمانہ عائد کیا گیا کیونکہ یہ ان کی دوسری غلطی تھی۔ واضح رہے کہ لکھنؤ سوپر جائنٹس کے کپتان رشبھ پنت کو آئی پی ایل 2025 میں ٹیم کا سفر ختم ہونے تک تین بار سلو اوور ریٹ کا قصوروار پایا گیا تھا اور اس کے لیے انہیں مجموعی طور پر 66 لاکھ روپے کا جرمانہ ادا کرنا پڑا ۔
