چنڈی گڑھ: پنجاب کے نئے چیف منسٹر چرنجیت سنگھ چنی اتوار کو اپنی کابینہ میں توسیع کریں گے جس میں 15 نئے وزراء کو شامل کیا جائے گا۔ذرائع کے مطابق حلف برداری کی تقریب راج بھون میں شام 4.30 بجے منعقد ہوگی جس میں گورنر بنواری لال پروہت 15 نئے وزراء کو عہدے اور رازداری کا حلف دلائیں گے ۔ بتایا جاتا ہے کہ کانگریس اعلی کمان نے ریاستی کابینہ میں نئے وزراء کے ناموں کی فہرست کو حتمی شکل دے دی ہے ، جس کے لیے چیف منسٹر کو ہفتے کے روز دوبارہ دہلی بلایا گیا۔چرنجیت نے آج دہلی سے یہاں پہنچنے کے بعد گورنر سے ملاقات کی اور کابینہ کی توسیع کے لیے باضابطہ خط انہیں سونپا۔ اس سے قبل پیر 20 ستمبر کو چرنجیت نے بطور چیف منسٹر کا حلف لیا اور سکھجندر سنگھ رندھاوا اور اوم پرکاش سونی نے نائب وزرائے اعلیٰ کے طور پر حلف لیا۔ ریاستی کابینہ میں زیادہ سے زیادہ تعداد 18 تک ہوسکتی ہے ۔ذرائع کے مطابق نئے وزراء میں سات نئے چہرے لیے جا سکتے ہیں اور آٹھ پرانے چہرے بھی واپسی کر سکتے ہیں۔ سابق وزیر اعلیٰ کیپٹن امریندر سنگھ کے قریبی پانچ وزراء کی چھٹی کیے جانے کا امکان ہے ۔ ان میں سادھو سنگھ دھرم سوت ، بلویر سدھو ، رانا گرمیت سوڈھی ، گورپریت کانگڑ اور سندر شام اروڑاہوسکتے ہیں۔
دھرم سوت پر پوسٹ میٹرک اسکالرشپ میں مبینہ گھپلے کا الزام ہے ۔ وہیں سوڈھی اور اروڑا بھی کیپٹن کے خاص ہیں۔ کانگڑ اپنے داماد کو سرکاری نوکری دلانے کے سبب نشانے پر رہے ہیں۔
