آج سہ پہر 3:30 میاچ کا آغاز، دونوں کی نظریں ٹاپ2 میں جگہ یقینی بنانے پر مرکوز
دبئی۔پوائنٹس ٹیبل میں سرفہرست پہنچنے کے لیے کوشاں چنئی سپر کنگز آج جمعرات کو یہاں پنجاب کنگز (پی بی کے ایس) کے خلاف انڈین پریمیئر لیگ (آئی پی ایل) کے میچ میں مضبوط دعویدار کے طور پر آغاز کرے گی۔ مہندرا سنگھ دھونی کی قیادت والی ٹیم کا پلڑا ، مسلسل دو شکستوں کے باوجود، پنجاب پر بھاری ہے، جو پلے آف کی دوڑ سے باہر ہونے کے راستے پر ہیں۔ گزشتہ سال کی ناقص کارکردگی کو بھولنے کے بعد اس سال شاندار واپسی کرنے والے چنئی نے یواے ای کے مرحلے میں اچھی کارکردگی کا مظاہرہ کیا ہے اور انہیں ہرانا آسان نہیں ہے۔چنئی کے بیٹسمین اچھی حالت میں ہیں خاص طور پر ریتوراج گائیکواڈ۔ ان کے بیٹسمین اس کارکردگی کو جاری رکھنے کے لیے پرعزم ہیں۔ گائیکواڈ اور تجربہ کار جنوبی افریقی بیٹسمین فاف ڈو پلیسی نے ٹاپ آرڈر میں اچھا کھیلا ہے ،جبکہ امباتی رائیڈو نے مڈل آرڈر میں مفید شراکت کی ہے ۔ معین علی نے بولنگ اور بیٹنگ دونوں میں اچھی کارکردگی کا مظاہرہ کیا لیکن سریش رائنا اور دھونی کی خراب فارم چنئی کے لیے تشویش کا باعث ہے۔ رویندرا جڈیجہ نے ایک بار پھر بطور آل راؤنڈر اپنی قابلیت ثابت کی ہے اور مفید شراکت کی ہے۔چنائی کے بولروں نے تاہم راجستھان رائلز کے خلاف میچ میں اچھی کارکردگی کا مظاہرہ نہیں کیا۔ انہیں ٹورنامنٹ کے اہم مرحلے سے بہت پہلے اپنی غلطیوں کی اصلاح کرنی ہوگی۔ دیپک چاہر نے اب تک 12 وکٹیں حاصل کی ہیں اور ٹیم کو چند مواقع پر اچھی شروعات دی ہے۔ شاردول ٹھاکر کے نام 15 وکٹیں ہیں اور وہ اپنی فارم کو برقرار رکھنے کی کوشش کریں گے۔جوش ہیزل ووڈ اور ڈوین براوو نے اپنی صلاحیتوں کو خوب نبھایا ہے جبکہ جڈیجہ نے ہر کردار کو اچھی طرح نبھایا ہے۔ سیم کوران زخموں کی وجہ سے باقی ٹورنامنٹ سے باہر ہو گئے ہیں لیکن چنئی زیادہ پریشان نہیں ہے کیونکہ براوو کی حالت اچھی ہے۔ جہاں تک پنجاب کا تعلق ہے، اس کی ٹیم مسلسل اچھی کارکردگی نہیں دکھا سکی ہے۔ کے ایل راہول کی قیادت والی ٹیم 10 پوائنٹس کے ساتھ چھٹی پوزیشن پر ہے۔ راہل اب تک 528 رنز بنا چکے ہیں جبکہ ان کے کرناٹک کے ساتھی میانک اگروال نے 429 رنز کی شراکت کی لیکن ان کے دوسرے بیٹسمین نہیں کھیلے جس سے پنجاب کو نقصان اٹھانا پڑاتھا۔ محمد سمیع(18 وکٹ) اور ارشدیپ سنگھ (16 وکٹ) بولنگ میں اسکے اسٹار رہے ہیں جبکہ روی بشنوئی نے اسپن میں اچھی کارکردگی کا مظاہرہ کیا ہے۔ پنجاب ایک بڑی جیت پر نظر رکھے گا تاکہ وہ آگر مگر کے ذریعے پلے آف میں جانے کی اپنی موہوم امیدیں برقرار رکھے۔ وا ضح رہے کہ میچ کا آغاز سہ پہر 3.30 بجے ہوگا۔