میدک۔27 نومبر (سیاست ڈسٹرکٹ نیوز)ضلع میدک میں گرام پنچایت کے انتخابات پرامن ماحول میں پختہ انتظامات کے ساتھ منعقد کرنے کی ہدایات ضلع کلکٹر راہول راج نے تمام متعلقہ عہدیداروں کو دیں۔ کلکٹر نے اپنے کیمپ آفس سے ڈی ایل پی اوز، ایم پی ڈی اوز اور ایم پی اوز کے ساتھ ویڈیو کانفرنس کے ذریعہ انتخابات کی تیاریوں کا جائزہ لیتے ہوئے کہا کہ مقامی اداروں کے انتخابات کو شفاف، منظم اور مکمل قانون کے مطابق منعقد کیا جانا ضروری ہے، تاکہ کسی قسم کی بے ضابطگی یا تنازعہ کی گنجائش باقی نہ رہے۔ انہوں نے کہا کہ گرام پنچایت سرپنچ اور وارڈ ممبر کے انتخاب کیلئے ہر سطح پر مؤثر تیاریاں کی جائیں اور نگران عملے کی مکمل تربیت کیساتھ تمام ذمہ داریوں کو انتہائی چوکسی کے ساتھ انجام دیا جائے۔ کلکٹر نے عہدیداروں کو ہدایت دی کہ انتخابی ضابطہ اخلاق پر سختی سے عملدرآمد یقینی بنائیں، کسی بھی مرحلہ پر لاپرواہی نہ برتی جائے۔انہوں نے واضح کیا کہ انتخابات تک تمام عہدیداروں کی چھٹیاں منسوخ رہیں گی تاکہ انتخابی عمل میں کوئی خلل نہ آئے۔ ویڈیو کانفرنس میں ایڈیشنل کلکٹر ناگیش، زیڈ پی سی ای او ایلّیا، ڈسٹرکٹ پنچایت آفیسر یادیا، نوڈل افسران اور ڈی ایل پی اوز شریک تھے۔
