نئی دہلی ۔ 3 اکٹوبر (ایجنسیز) ہندو مہا سبھا کی لیڈر پوجا شکون پانڈے، جو 2019 میں گاندھی جی کے قتل کی متنازعہ نمائش سے سرخیوں میں آئی تھی، اب ایک چونکا دینے والے قتل کیس میں فرار ہے۔ اس کے شوہر اشوک پانڈے کو گرفتار کر لیا گیا ہے۔ پولیس پوجا کی تلاش میں سرگرم ہے۔ پولیس کے مطابق، پوجا اور اس کے شوہر نے ایک کاروباری ابھیشیک گپتا کے قتل کے لیے قاتل کی خدمات حاصل کیں۔ یہ قتل مالی تنازعہ پر کیا گیا۔ تاہم، مقتول کے والد نے ایک خوفناک دعویٰ کیا ہے جو اس کیس کو مزید پیچیدہ بنا رہا ہے۔میڈیا رپورٹس کے مطابق علی گڑھ میں 30 سالہ کاروباری ابھیشیک گپتا کو گولی مار کر ہلاک کر دیا گیا۔ یہ واقعہ 23 ستمبر کی رات پیش آیا جب وہ بس کا انتظار کر رہے تھے۔ دو موٹر سائیکل سواروں نے انہیں گولی مار دی اور وہ موقع پر ہی دم توڑ گئے۔پولیس نے ایک شوٹر محمد فضل کو گرفتار کر لیا ہے۔ فضل نے انکشاف کیا کہ یہ قتل 3 لاکھ روپے کی سپاری (معاہدہ) پر کیا گیا تھا۔ اس نے پوجا شکون پانڈے اور ان کے شوہر اشوک پانڈے کا نام لیا۔ سی سی ٹی وی فوٹیج اور تفتیش کے بعد اشوک پانڈے کو گرفتار کر لیا گیا۔اشوک پانڈے نے پولیس کو بتایا کہ ابھیشیک ان کے گھر پر رہتا تھا اور ان پر 10 لاکھ روپے کا قرض تھا۔ تاہم، ابھیشیک کے والد نیرج گپتا نے ایک خوفناک دعویٰ کیا ہے۔ ان کا کہنا ہے کہ ابھیشیک کے پوجا شکون پانڈے کے ساتھ ناجائز تعلقات تھے۔نیرج گپتا کے مطابق، پوجا ابھیشیک سے شادی کرنا چاہتی تھی اور اسے اپنے کاروبار میں حصہ دار بنانا چاہتی تھی۔ جب ابھیشیک نے پوجا سے دوری اختیار کرنا شروع کی اور اس کا نمبر بلاک کر دیا، تو پوجا ناراض ہو گئی۔ والد کا دعویٰ ہے کہ اسی ناراضگی کے باعث پوجا نے ابھیشیک کو قتل کروا دیا۔پولیس اب پوجا شکون پانڈے اور دوسرے شوٹر آصف کی تلاش میں ہے۔ اس کیس میں مزید سنسنی خیز انکشافات کی توقع ہے۔ یہ کیس مالی تنازعہ اور ناجائز تعلقات کے درمیان الجھ گیا ہے۔
