سینٹ لوشیا ۔رواں ٹی ٹوئنٹی ورلڈ کپ میں ویسٹ انڈیز نے اب تک کا سب سے بڑا اسکور بناتے ہوئے افغانستان کو 104 رنز سے شکست دی۔ افغانستان نے ٹاس جیت کر پہلے فیلڈنگ کا فیصلہ کیا تھا، ویسٹ انڈیز نے 5 وکٹوں کے نقصان پر218 رنز بنائے اور افغانستان کو جیت کے لیے 219 رنز کا ہدف دیا۔ ویسٹ انڈیز کے اوپنرز نے ٹیم کو 22 رنز کا آغاز فراہم کیا، برینڈن کنگ7 رنز بنا کر عظمت اللّٰہ کی گیند پر آوٹ ہوئے۔ اس کے بعد آنے والے بیٹر نکولس پورن اور جونسن چارلس نے دوسری وکٹ پر ٹیم کو38 گیندوں پر80 رنز کی پارٹنر شپ فراہم کی، جونسن چارلس 43 رنز بناکر آوٹ ہوئے۔ وکٹ کی دوسری جانب نکولس پورن کی برق رفتار بیٹنگ جاری رہی اور انہوں نے تیسری وکٹ کے نقصان پر شائے ہوپ کے ساتھ ٹیم کو33 رنز کی پارٹنر شپ فراہم کی، ہوپ 25 رنز بناکر آوٹ ہوئے۔ نکولس پورن 53 گیندوں پر98 رنز کی عمدہ اننگزکھیل کر آخری اوور میں عظمت اللّٰہ عمرزئی کے ہاتھوں رن آوٹ ہوئے۔ انہوں نے اپنی اننگز میں 8 چھکے اور 6 چوکے لگائے۔ ویسٹ انڈیز کے آخری آوٹ ہونے والے کھلاڑی رومن پاول تھے جنہوں نے 26 رنزکی اننگز کھیلی۔ ہدف کے تعاقب میں افغانستان کی ٹیم 114 رنز پر آل آؤٹ ہوئی۔ افغانستان کی جانب سے ابراہیم زردان 38، عظمت اللّٰہ 23 اور کپتان راشد خان 18 رنز بنا کر نمایاں رہے۔ ویسٹ انڈیز کی طرف سے میک کوئے نے 3 جبکہ عقیل حسین اورگداکیش موتی نے فی کس دوکھلاڑیوں کو آؤٹ کیا، ایک ایک کھلاڑی کو آندرے رسل اور جوزف الرازی نے بھی آؤٹ کیا۔ واضح رہے کہ گروپ سی میں شامل دونوں ٹیمیں پہلے ہی سوپر ایٹ میں داخل کرچکی ہیں۔
