بارباڈوس۔11 ستمبر (سیاست ڈاٹ کام ) تجربہ کارآل راؤنڈر کیرون پولارڈ کو ویسٹ انڈیز کے محدود اوورس کی کرکٹ کو بہتر بنانے کے مقصد کے ساتھ فوری طور پر ٹیم کے ونڈے اور ٹوئنٹی 20 کی کپتانی سونپ دی گئی ہے۔32 سالہ پولارڈ ونڈے فارمیٹ میں جیسن ہولڈر اور ٹوئنٹی 20 کرکٹ میں کارلوس بریتھویٹ کی جگہ لیں گے۔ پولارڈ کو حال ہی میں ہندستان کے خلاف ٹوئنٹی 20 ٹیم میں بھی واپس بلایا گیا تھا جبکہ انہوں نے 2016 کے بعد سے ونڈے کرکٹ ہی نہیں کھیلا ہے۔ ویسٹ انڈیز کی ٹیم کی ونڈے ورلڈ کپ میں کارکردگی مایوس کن رہی تھی اور وہ نویں نمبر پر رہی ۔ ونڈیز کرکٹ بورڈ اور سلیکٹرز نے محدود کرکٹ میں نئے کپتان کو مقرر کرنے کی سفارش کی تھی۔ ٹوباگو میں گزشتہ دو دنوں میں کرکٹ ویسٹ انڈیز بورڈ کے ڈائریکٹرز کے اجلاس کے بعد یہ فیصلہ لیا گیا ہے۔ویسٹ انڈیز کرکٹ کے سربراہ رکی اسکئرٹ نے پولارڈ کو کپتانی سونپے جانے کا اعلان کیا۔ پولارڈ نے اپنے تقرر پرخوشی کا اظہار کرتے ہوئے کہاکہ مجھے ویسٹ انڈیز کرکٹ ٹیم کا کپتان مقرر کئے جانے پر بہت فخر محسوس ہو رہا ہے۔ میں کرکٹ بورڈ کا شکریہ ادا کرنا چاہتا ہوں جنہوں نے مجھ پر بھروسہ کیا ہے۔ میں کوچنگ عملے اور کھلاڑیوں کے ساتھ کام کرنے کے لئے بہت پرجوش ہوں۔ پولارڈ اب دو فارمیٹس میں ٹیم کی قیادت سنبھالیں گے۔ وہ بطور کپتان پہلا ٹورنمنٹ نومبر میں افغانستان کے خلاف کھیلیں گے جہاں ہندوستان کی سر زمین پر ہونے والی اس سیریز میں دونوں ٹیمیں تین ٹوئنٹی 20 اور تین ونڈے کے علاوہ ایک ٹسٹ کھیلیں گی۔
