ترواننت پورم ۔ 9 ڈسمبر (سیاست ڈاٹ کام ) نوجوان شیوم دوبے نے ویسٹ انڈیزکے خلاف ترواننت پورم ٹی20 میں اپنی پہلی بین الاقوامی نصف سنچری لگائی۔ انہوں نے 27 گیندوں میں دوچوکوں اور4 چھکوں کی مدد سے 50 رن پورے کئے۔ اس مقابلے میں شیوم دوبے کو تیسرے نمبرپر بھیجا گیا۔ بائیں ہاتھ کے شیوم دوبے نے اس موقع کا پورا فائدہ اٹھایا۔ ایک وقت شیوم دوبے 14 گیندوں میں 12 رن بناکرکھیل رہے تھے۔ اس کے بعد ہندوستانی اننگز کے 8 ویں اوورہونے پران کا اسکور18 گیند میں 24 رن تھا، لیکن کیرون پولارڈ کے اوورسے سب کچھ بدل گیا۔ اس کے بعد شیوم دوبے کا اسکور 24 گیندوں میں 48 رنز ہوگیا۔ کیرون پولارڈ کا اووردوبے کے لئے تبدیلی لے کرآیا۔ اس اوورمیں انہوں نے پہلی گیند پر دو رن لئے۔ دوسری گیند پربھی دورن لئے، لیکن رن دوڑنے کے دوران پولارڈ درمیان میں آگئے، جس سے دوبے کوپریشانی ہوئی۔ اس کا بدلا ہندوستانی بیٹسمین نے چھکا لگاکرلیا۔ پولارڈ نے باؤنسرڈالی اوراسے دوبے نے ڈیپ اسکوائرلیگ کے اوپرسے باؤنڈری کے باہربھیج دیا۔ ا گلی گیند پرپھرسے چھکا لگادیا۔ گیند تھوڑی چھوٹی تھی، جسے دوبے نے مڈوکٹ کے اوپرسے شائقین کے درمیان بھیج دیا۔ انہوں نے پولارڈ کے ایک اوورمیں 26 رنز بنائے۔ حالانکہ وہ نصف سنچری مکمل کرنے کے بعد بہت زیادہ دیرتک نہیں ٹک پائے۔
