نئی دہلی، 24 اکتوبر (یو این آئی) انتخابی کمیشن نے جمعہ کے روز بہار اسمبلی اور دیگر ریاستوں/مرکزکے زیر انتظام علاقوں میں ہونے والے ضمنی انتخابات کیلئے پولنگ کے دن ووٹروں کو سہولیات فراہم کرنے کی ہدایت دی ہے ۔ اس سلسلے میں ریاستی اعلیٰ انتخابی افسران کو ہدایات جاری کردی گئی ہیں۔ پولنگ اسٹیشنوں پر اہم سہولیات میں پینے کا پانی، ویٹنگ روم، پانی کی سہولت، بیت الخلا، مناسب روشنی، معذور ووٹر وں کیلئے ریمپ کے ساتھ آسان رسائی، معیاری پولنگ بوتھ اور مناسب نشانات و ہدایات شامل ہیں۔ کمیشن کی خاص پہل کے تحت پولنگ اسٹیشن کے داخلی دروازے پر ووٹروں کو اپنا موبائل فون جمع کروانے کی سہولت فراہم کی جائے گی۔ پولنگ میں داخل ہونے سے پہلے ووٹروں کو اپنا فون بند کر کے ایک مقررہ رضاکار کو دینا ہوگا، جو ووٹنگ کے بعد واپس لوٹا دیا جائے گا۔ کمیشن نے ریاستی افسران کو ہدایت دی ہے کہ یہ سہولیات یقینی بنانا اور متعلقہ انتظامات کرنا لازمی ہے اور تمام پولنگ اسٹیشنوں پر اس کے سخت نفاذ کی نگرانی کی جائے گی۔ تمام علاقائی افسران کو ہدایت دی گئی ہے کہ وہ پولنگ کی تاریخوں سے قبل یہ ضروری انتظامات مکمل کر لیں تاکہ تمام ووٹروں کیلئے آسان اور بلا رکاوٹ ووٹنگ یقینی بنائی جا سکے ۔
