نظام آباد۔30اکتوبر( سیاست ڈسٹرکٹ نیوز) پولیس یومِ شہیداں کی یاد میں ’’کمیونٹی کنٹاکٹ پروگرام‘‘ کے تحت ایڑگٹلہ پولیس اسٹیشن کی جانب سے منشیات اور بُرے عادت سے نوجوانوں کو محفوظ رکھنے کے مقصد سے منعقدہ کبڈی ٹورنمنٹ اختتام پذیر ہوا۔ اس موقع پر نظام آباد کے پولیس کمشنر مسٹر پی سائی چیتنیا نے مہمانِ خصوصی کی حیثیت سے شرکت کی اور فائنل میچ کا آغاز کیا۔یہ ٹورنمنٹ آرمور ڈویژن کے ایڑگٹلہ پولیس اسٹیشن حدود کے تحت تال راما پور گاؤں میں گزشتہ دو دنوں تک جاری ہیں جس میں مختلف علاقوں سے 16 ٹیموں نے جوش و خروش کے ساتھ حصہ لیا۔ اختتامی تقریب میں پولیس کمشنر مسٹر سائی چیتنیا نے خطاب کرتے ہوئے نوجوانوں کو مشورہ دیا کہ وہ منشیات اور دیگر برے عادات سے مکمل طور پر گریز کریں اور اپنی توانائی کو مثبت سمت میں استعمال کریں۔انہوں نے کہا کہ ’’یہ کبڈی مقابلہ محض ایک کھیل نہیں بلکہ ایک ایسا ذریعہ ہے جو نوجوانوں کو اخلاقی، جسمانی اور ذہنی طور پر مضبوط بناتا ہے۔ آج کے معاشرے میں نوجوان طبقہ منشیات کی لت میں مبتلا ہو رہا ہے جو زندگی کو برباد کرنے والا خطرناک راستہ ہے۔ اگر نوجوان صحت مند رہیں، اچھے عزائم رکھیں اور محنت کے ساتھ آگے بڑھیں تو وہ خود بھی کامیاب ہوں گے اور ملک کا مستقبل بھی روشن ہوگا۔‘‘ مسٹر سائی چیتنیا نے مزید کہا کہ کھیل نوجوانوں میں نظم و ضبط، انسانیت اور باہمی تعاون کا جذبہ پیدا کرتے ہیں۔ انہوں نے نوجوانوں پر زور دیا کہ وہ اچھے دوستوں کا انتخاب کریں، مثبت عادات اپنائیں اور اپنی زندگی کو سماج کے لیے مثال بنائیں۔تقریب کے دوران پولیس کمشنر مسٹر سائی چیتنیا نے کامیاب کھلاڑیوں میں انعامات تقسیم کیے اور ان کے جذبے کی ستائش کی۔ اس موقع پر آرمور اے سی پی مسٹر وینکٹیشورلو، بھیمگل سرکل انسپکٹر مسٹر ستیانارائن، ایڑگٹلہ سب انسپکٹر مسٹر راجیشور، پولیس عملہ، کھلاڑی کے علاوہ عوام نے بڑی تعداد میں شرکت کی ۔
