برلن: جرمن چانسلر انجیلا مرکل اور فرانسیسی صدر امانویل میکرون پولینڈ اور بیلاروس کی مشترکہ سرحد پر پیدا شدہ بحرانی صورت حال کے خاتمے کی کوشش میں ہیں۔ جرمن چانسلر مرکل نے بیلاروس کے صدر لوکاشینکو سے ٹیلی فون پر بات چیت کی، جب کہ فرانسیسی صدر میکرون نے بھی روسی ہم منصب ولادیمیر پیوٹن سے گفتگو کی۔ یورپی یونین کی اس بیرونی سرحد پر اس وقت بڑی تعداد میں تارکین وطن پھنسے ہوئے ہیں۔ پورپی یونین نے ان بحرانی حالات کا ذمے دار بیلاروس کے صدر لوکاشینکو کو ٹھہرایا ہے اور الزام لگایا ہے کہ وہ جان بوجھ کر تارکین وطن کو یورپی یونین کی طرف اسمگل کر رہے ہیں۔ یونین کے مطابق ایسا کرتے ہوئے لوکاشینکو بیلاروس پر پہلے سے عائد یورپی پابندیوں کا بدلہ لے رہے ہیں۔ دوسری جانب یورپی یونین کے وزرائے خارجہ کے اجلاس میں بیلاروس پر انسانی اسمگلنگ کے تناظر نئی پابندیاں عائد کردی گئیں۔ ان پابندیوں میں بیلاروس کی بعض شخصیات اور ادارے نشانہ بنائے گئے ہیں۔ ان پر الزام عائد ہے کہ وہ انسانوں کی غیرقانونی اسمگلنگ کے مرتکب ہوئے ہیں۔
