سرینگر : ہندوستانی فوج کی شمالی کمان کے جنرل آفیسر کمانڈنگ ان چیف (جی او سی۔ این۔سی)، لیفٹیننٹ جنرل اوپیندر دویدی نے اتوار کو یقین دلایا کہ پونچھ دہشت گردانہ حملے کے مجرموں کو جلد ہی نتائج کا سامنا کرنا پڑے گا۔ لیفٹیننٹ جنرل دویدی نے ادھم پور کے کمانڈ ہاسپٹل میں پونچھ دہشت گردانہ حملے میں بچ جانے والوں کی عیادت کی۔ 20 اپریل کو ہونے والے اس حملے میں 5 فوجی شہید ہوئے تھے۔ حملے میں بچ جانے والوں سے بات چیت کے دوران، جی او سی نے یقین دلایا کہ دہشت گرد حملے کے ذمہ داروں کے خلاف ضروری کارروائی کی جا رہی ہے۔ پونچھ میں جمعرات کو دہشت گردوں نے فوج کی گاڑی کو نشانہ بنایا اور فائرنگ کرتے ہوئے دستی بم پھینکے۔ حملے میں 5 جوان شہید اور ایک جوان زخمی ہوا۔ فوجی ترجمان لیفٹیننٹ کرنل دیویندر کے مطابق دہشت گردوں نے جمعرات کی سہ پہر 3بجے کے قریب اس وقت حملہ کیا جب فوج کی گاڑی راجوری سیکٹر میں بھمبر گلی اور پونچھ کے درمیان تھی۔ تیز بارش اور کم حد نگاہ کا فائدہ اٹھاتے ہوئے دہشت گردوں نے فائرنگ کی۔ دہشت گردوں کی جانب سے پھینکے گئے دستی بم سے فوج کی گاڑی میں آگ لگ گئی۔
