پونے۔ 9اکٹوبر (سیاست ڈاٹ کام ) ہندوستان اور جنوبی افریقہ کے درمیان جمعرات سے تین میچوں کی ٹسٹ سیریز کا دوسرا مقابلہ یہاں پونے میں کھیلا جائے گا جہاں میزبان ٹیم کی توجہ مقابلہ جیت کرسیریز اپنے نام کرنے پر ہو گی۔ ہندوستان نے وشاکھاپٹنم میں پہلے میچ میں جنوبی افریقہ کو203 رنز سے شکست دے کر سیریز میں 1-0کی برتری حاصل کر لی تھی ۔ ہندوستان کے لئے مثبت بات یہ ہے کہ اس کے دونوں اوپنر روہت شرما اورمینک اگروال نے پہلے مقابلے میں بہترین مظاہرہ کیا ہے خاص طور روہت نے جو اپنے ٹسٹ کیریئر میں پہلی مرتبہ بطور اوپنر پہلی اننگز میں176 اور دوسری اننگز میں127 رنز بنائے جبکہ مینک نے پہلی اننگز میں215 رنز بنا کر اپنے ٹسٹ کریئر کی پہلی بین الاقوامی ڈبل سنچری بنائی ۔ دونوں کے درمیان پہلی اننگز میں 317 رنز کی بڑی شراکت ہوئی تھی جس۔ ہندوستان کو دوسرے میچ میں ایک بار پھراس جوڑی سے ایسے ہی کارکردگی کی توقع رہے گی جس سے وہ مہمان ٹیم پر شروع سے ہی گرفت مضبوط رکھے ۔ہندوستانی ٹیم کو اگرچہ مڈل آرڈر میں تھوڑا احتیاط برتنا ہوگا۔ پہلے مقابلے کی پہلی اننگز ٹاپ آرڈر کی مضبوط شراکت داری کے بعد مڈل آرڈر لڑکھڑا گیا تھا لیکن ٹیم کے لئے راحت کی بات ہے کہ چتیشور پجارا پہلی اننگز میں ناکام ہونے کے بعد دوسری اننگز میں 81 رن کی اہم اننگز کھیلی۔کپتان کوہلی، اجنکیا رہانے ،ہنوما وھاری اور وکٹ کیپر وردھمان ساہا کو بھی مڈل آرڈر میں اہم کردار ادا کرنا ہوگا۔بولنگ میں ٹیم کا مضبوط شعبہ رہا ہے اور پہلی اننگز میں جس طرح آف اسپنر روی چندرن اشون نے اسپن کے جادو میں جنوبی افریقہ کی ٹیم کو باندھ کر رکھا
اس سے ہندوستانی بولنگ اور مضبوط دکھائی دے رہی ہے جبکہ دوسری اننگز میں محمد سمیع نے پانچ وکٹ حاصل کرکے مہمان ٹیم کی کمر توڑ دی تھی جس سے ٹیم نے یکطرفہ انداز میں مقابلہ اپنے نام کرلیا تھا۔جنوبی افریقہ کے پاس سیریز بچانے کا یہ آخری موقع ہے ۔اگر ٹیم ہندوستان کو کم اسکور میں روکنے میں کامیاب رہتی ہے تو ان کے پاس موقع رہے گا ۔ جنوبی افریقہ کی ٹیم کو بھلے ہی پہلے میچ میں شکست کا سامنا کرنا پڑا تھا لیکن انہوں نے پہلی اننگز میں ہندوستانی بولروں کو کافی پریشان کیا تھا۔اوپنر ڈین ایلگر اور وکٹ کیپر کوئنٹن ڈی کاک نے پہلی اننگز میں اپنی ٹیم کو ابتدائی جھٹکوں سے ایک وقت باہر نکالنے کی پوری کوشش کی تھی۔ دونوں کی سنچری کی بدولت ہندوستانی ٹیم صرف71 رنز کی ہی برتری حاصل کر پائی تھی۔جنوبی افریقہ کو دوسرے مقابلے میں اپنی بیٹنگ میں توجہ مرکوز کرنے کی ضرورت ہے خاص طور پر جس طرح اس کی ٹیم کی کارکردگی دوسری اننگز میں رہی اسے دیکھتے ہوئے کپتان فاف ڈو پلیسس کو اس شعبے میں بہتری کی ضرورت ہے ۔بولروں میں ورنان فلینڈر اورکیگسو ربادا پر میزبان ٹیم کو روکنے کی بڑی ذمہ داری ہوگی۔پونے کی پچ ملک کی سب سے فلیٹ پچوں میں سے ایک تصور کی جاتی ہے اور اس مقابلے میں اس کی کارکردگی کو دیکھنا دلچسپ ہوگا۔ اس میدان پر کھیلے گئے 26 فرسٹ کلاس میچوں میں150 سے زائد کے10 اسکور، تین ڈبل سنچری اور دو ٹرپل سنچری بنی ہیں۔ ان26 میچوں میں13 ڈرا رہے ہیں۔ اس میدان پر کھیلے گئے چار ونڈے میں سے تین میں پہلی اننگز میں280 سے زیادہ سے اسکور بنے ہیں۔ پونے میں 2017 میں پہلا ٹسٹ کھیلا گیا تھا جو تین دن کے اندر ختم ہو گیا تھا۔ ہندوستان نے 105 اور 107 رنز بنائے تھے اور اس پچ کو خراب ریٹنگ ملی تھی۔ یہ میچ آسٹریلیا کے خلاف ہوا تھا۔