پونے: کولہاپور میں واقع بریانی کی ایک ہوٹل کی دیوار پر آویزاں بہادر شاہ ظفر کا پوٹریٹ ہندوانتہاپسندوں نے نکال کر بگاڑ دیا۔ ان کا دعویٰ ہیکہ آخری مغل شہنشاہ اورنگ زیب کے وارث تھے۔ کولہاپور میں راجارامہ پوری پولیس اسٹیشن سے وابستہ عہدیدار نے کہا کہ یہ واقعہ رات پیش آیا تاہم اس ضمن میں کسی نے بھی کوئی شکایت درج نہیں کروائی۔ عہدیدار نے کہا کہ دائیں بازوکی تنظیم سے وابستہ کچھ نوجوان بریانی کی ہوٹل پہنچے جہاں انہوں نے بہادر شاہ ظفرکا پوٹریٹ دیکھا۔ اس پر انہوں نے یہ کہتے ہوئے اعتراض کیا کہ اورنگ زیب کے وارث کی تصویر دیوار پرکیو ں لٹکائی گئی اور ہوٹل کے عملہ سے اسے نکالنے کو کہا۔ عملہ راضی ہوگیا مگر پورٹریٹ نہیں نکالا گیا۔ رات یہ گروپ دوبارہ ہوٹل پہنچا اور پوٹریٹ نکال کر اسے بگاڑدیا۔ یاد رہیکہ بہادر شاہ ظفر20 ویں اورآخری مغل شہنشاہ اور اردو کے شاعر تھے۔ 1862ء میں 87سال کی عمر میں برما کے رنگون میں ان کا انتقال ہوا جہاں انہیں 1857 کے غدر پر جلاوطن کیا گیا تھا۔
