بی جے پی کو نئے حلیفوں کی تلاش
حیدرآباد۔/16 جولائی، ( سیاست نیوز) جنوبی ہند میں پارٹی کے استحکام کیلئے بی جے پی اعلیٰ قیادت نے تلگو ریاستوں میں نئے حلیفوں کی تلاش شروع کردی ہے۔ آندھرا پردیش میں تلگودیشم اور جنا سینا سے انتخابی مفاہمت کی حکمت عملی تیار کی جارہی ہے۔ بی جے پی زیر قیادت نیشنل ڈیموکریٹک الائنس ( این ڈی اے ) کا اجلاس 18 جولائی کو نئی دہلی میں منعقد ہوگا۔ تلگو دیشم نے اگرچہ اجلاس میں شرکت کے بارے میں کوئی وضاحت نہیں کی ہے تاہم جنا سینا کے سربراہ پون کلیان اجلاس میں شرکت کریں گے۔ اداکار سے سیاستداں بننے والے پون کلیان کو این ڈی اے اجلاس میں شرکت کیلئے بی جے پی نے دعوت نامہ روانہ کیا ہے۔ پون کلیان پارٹی کی پولٹیکل افیرس کمیٹی کے سربراہ این منوہر کے ہمراہ 17 جولائی کو نئی دہلی روانہ ہوں گے۔ بتایا جاتا ہے کہ پون کلیان کے ذریعہ بی جے پی تلگودیشم کو اسمبلی و لوک سبھا چناؤ میں انتخابی مفاہمت کیلئے راضی کرنا چاہتی ہے۔ر