امریکی صدر کی یوکرینی وزرا سے پولینڈ میں ملاقات
وارسا : امریکی صدر جوبائیڈن نے وارسا میں یوکرین پناہ گزینوں سے ملاقات کے موقع پر روسی صدر پوٹن کو قصائی قرار دیا ۔ قبل ازیں انہوں نے پولینڈ کے دارالحکومت وارسا میں یوکرین کے دو وزرا سے ملاقات کی جو روسی حملوں کے آغاز کے بعد کیف کے عہدیداروں سے ان کی پہلی ملاقات ہے۔میڈیا کے مطابق یوکرین کے وزیرخارجہ دیمتروکولیبا اور وزیردفاع اولیکسی ریزنیکوف نے یوکرین سے باہر غیرمعمولی سفر کیا اور پولینڈ پہنچے، جو روسی فورسز کے خلاف مزاحمت پر بڑھتے دفاع اطمینان کی نشانی ہے۔امریکی صدر اور یوکرینی وزرا کے درمیان ملاقات وارسا کے میریٹ ہوٹل میں ہوئی جہاں تنازعہ کے آغاز کے بعد یوکرین سے مہاجرین کی آمد مسلسل جاری ہے۔اے ایف پی کے رپورٹر نے بتایا کہ جوبائیڈن سفید رنگ کی ٹیبل کے سامنے سیکریٹری آف اسٹیٹ انٹونی بلنکن اور امریکی سیکریٹری دفاع لیوئیڈ آسٹن کے ساتھ کولیبا اور ریزینیکف کے سامنے بیٹھے ہوئے تھے۔ٹیبل کے عقب میں یوکرین اور امریکا کے پرچم بھی نمایاں تھے۔یوکرین کے وزیرخارجہ سے امریکی صدر سے آخری ملاقات روسی حملے سے دو روز قبل 22 فروری کو تھی۔اس کے بعد کولیبا نے سیکریٹری اسٹیٹ بلنکن سے 5 مارچ کو یوکرینی سرحد کے قریبی علاقے میں ملاقات کی تھی۔امریکی صدر رواں ہفتے کے آغاز میں برسلز میں یورپی یونین اور نارتھ اٹلانٹک ٹریئٹی آرگنائزیشن (نیٹو) کے رہنماؤں کے اجلاس میں شرکت کے بعد پولینڈ کے دورے پر پہنچے تھے جہاں انہوں نے دوسرے اور آخری روز یوکرینی وزرا سے ملاقات کی۔گزشتہ روز انہوں نے یوکرینی سرحد کے قریب پولینڈ میں تعینات امریکی فوجیوں اور تنازع سے متاثر ہو کر منتقل ہونے والے افراد کی امداد میں مصروف کارکنوں سے ملاقات کی تھی۔جوبائیڈن نے روسی حملوں کے خلاف حوصلے کے ساتھ لڑنے پر یوکرین کے عوام کی تعریف کی اور اس کو چین میں تیانانمین اسکوائر میں 1989 میں جمہوریت پسندوں کی مزاحمت سے تشبیہ دی۔
