نئی دہلی، 27 مارچ (یو این آئی) بین الاقوامی بازار میں خام تیل کی قیمتوں میں اضافے کے پیش نظر حکومت نے جمعہ کو پٹرول اور ڈیزل پر ایکسائز ڈیوٹی میں 10‘10 روپے فی لیٹر کی کمی کی۔آج جاری کردہ ایک نوٹیفکیشن میں، وزارت خزانہ نے کہا کہ پٹرول پر ایکسائز ڈیوٹی 13 روپے فی لیٹر سے کم کر کے 3 روپے فی لیٹر اور ڈیزل پر 10 روپے فی لیٹر سے کم کر کے صفر کر دی گئی ہے ۔وزیر خزانہ نرملا سیتا رمن نے سوشل میڈیا پر ایک پوسٹ میں کہا کہ یہ کمی عام آدمی کو قیمتوں میں اضافے سے بچانے کیلئے کی گئی ہے ۔ اس بارے میں پارلیمنٹ کو بھی آگاہ کر دیا گیا ہے ۔دوسری طرف اپوزیشن نے حکومت کے اس اقدام پر تنقید کی ہے ۔
قابل ذکر ہے کہ مغربی ایشیا کے بحران کی وجہ سے بین الاقوامی مارکیٹ میں خام تیل کی قیمتوں میں اضافے کی وجہ سے آئل مارکیٹنگ کمپنیوں پر دونوں فوسل فیول کی قیمتوں میں اضافے کا دباؤ تھا۔ ایکسائز ڈیوٹی میں کمی سے انہیں راحت ملے گی۔ یہ کمی پبلک سیکٹر آئل مارکیٹنگ کمپنیوں کی جانب سے نیپال، بھوٹان، سری لنکا اور بنگلہ دیش کو کی جانے والی برآمدات پر بھی نافذ ہوگی۔اس کے علاوہ حکومت نے ڈیزل کی برآمدات پر 21.5 روپے اور ہوابازی کے ایندھن کی برآمدات پر 29.5 روپے فی لیٹر ڈیوٹی عائد کی ہے ۔اسپیشل ایکسائز ڈیوٹی میں کوئی تبدیلی نہیں کی گئی۔ پیٹرول پر خصوصی ایکسائز ڈیوٹی صفر ہے ، جبکہ ڈیزل پر 18.5 روپے فی لیٹر ہے ۔
