کانگریس کی جنرل سکریٹری پریانکا گاندھی نے پٹرول اور ڈیزل پر ایکسائز ٹیکس (ایکسائز ڈیوٹی) کے حوالے سے مرکزی حکومت پر حملہ کیا ہے۔ انہوں نے کہا کہ پٹرول اور ڈیزل پر ٹیکس میں 12 گنا اضافہ کرکے عوام کو لوٹا جارہا ہے۔ کانگریس کی جنرل سکریٹری نے فیس بک پوسٹ میں لکھا ہے کہ سال 2013 میں ، جب بین الاقوامی مارکیٹ میں خام تیل کی قیمت 101 ڈالر فی بیرل تھی ، اس وقت ملک میں لوگوں کو پٹرول 66 روپے فی لیٹر اور ڈیزل 51 روپے فی لیٹر مل رہا تھا تب مرکزی حکومت پیٹرول پر 9 روپے فی لیٹر جبکہ ڈیزل پر 3 روپے فی لیٹر ٹیکس وصول کررہی تھی ۔لیکن 2021 میں ، مرکزی حکومت آپ سے پیٹرول پر 33 روپے اور ڈیزل پر 32 روپے فی لیٹر ٹیکس وصول کررہی ہے۔ بی جے پی حکومت نے پٹرول اور ڈیزل پر ایکسائز ڈیوٹی میں 12 گنا اضافہ کیا ہے۔
