مودی حکومت صرف ٹیکسوں میں اضافہ کررہی ہے‘راہول گاندھی کا الزام
نئی دہلی: کانگریس کے سابق صدر راہول گاندھی نے پیر کے روز پیٹرول اور ڈیزل کی قیمتوں میں جاری اضافے کے لئے وزیر اعظم نریندر مودی پر تنقید کرتے ہوئے کہا ہے کہ ان کے دور حکومت میں ٹیکس میں مسلسل اضافے کی لہریں آرہی ہیں ، جس سے مہنگائی عروج پر ہے اور عام لوگوں کی زندگی مشکل ہوچکی ہے ۔راہول گاندھی نے ٹویٹ کیا کہ کئی ریاستوں میں ان لاک کا عمل شروع ہو رہا ہے ۔ پٹرول پمپ پر بل کی ادائیگی کے دوران آپ کومودی سرکار کے ذریعہ کی گئی مہنگائی میں وکاس نظر آئے گا۔ ٹیکس وصولی کی وبا کی لہریں مسلسل آتی جارہی ہیں۔کانگریس کے محکمہ مواصلات کے سربراہ رندیپ سنگھ سرجے والا نے بھی ٹیکسوں میں اضافے پر حکومت پر سخت تنقید کرتے ہوئے ٹویٹ کیاکہ بڑے پیمانے پر عوام سے لوٹ کھسوٹ جاری ہے۔ گزشتہ 13 ماہ سے پٹرول 25.72 روپے اور ڈیزل میں 23.93 روپے فی لیٹر مہنگا ہواہے ۔ کئی ریاستوں میں اس کی قیمتیں 100 روپئے فی لیٹر سے متجاوز ہوگئی ہیں۔ کانگریس کی جانب سے پٹرولیم اشیاء کی قیمتوں میں مسلسل اضافہ پر تنقیدوں کا سلسلہ جاری ہے لیکن قیمتوں میں کمی کے مطالبہ کو حکومت مسلسل نظر انداز کررہی ہے ۔کانگریس نے پٹرولیم اشیاء کی قیمتوں میں کمی کے علاوہ ان کوجی ایس ٹی کے تحت لانے کا بھی کئی بار مطالبہ کرچکی ہے ۔ملک کی کئی ریاستوں اور بڑے شہروں میں پٹرول کی قیمت 100روپئے فی لیٹر سے تجاوز کرچکی ہے اور عوام کے روز مرہ کے اخراجات میں اس کی قیمت میں اضافہ کا بہت بڑا اثر ہورہا ہے ۔پٹرول کی قیمت میں اضافہ کے نام پر پیشتر اشیاء ضروریہ کی قیمتوں میں اضافہ کیا جارہا ہے ۔ کانگریس کے قائدین اور کارکنوں کی جانب سے گذشتہ کئی دنوں سے ملک کی کئی ریاستوں میں پٹرولیم اشیاء کی قیمتوں میں اضافہ کے خلاف احتجاج کا سلسلہ جاری ہے اور حکومت سے قیمتوں میں اضافہ کو فوری واپس لینے کا مطالبہ کیا جارہا ہے۔ دیگر اپوزیشن جماعتوں نے بھی پٹرول اور ڈیزل کی قیمتوں میں اضافہ کو نامناسب قرار دیا ہے۔ کانگریس کا کہنا ہے کہ مودی حکومت کی جانب سے ٹیکسوں میں اضافہ کیا جارہا ہے۔ قیمتوں میں اضافہ کے لئے خام تیل کی قیمتوں میں اضافہ ذمہ دار نہیں ہے۔ پٹرولیم اشیاء کی قیمتوں میں اضافہ کے خلاف اپوزیشن جماعتوں کے علاوہ ٹرانسپورٹرس کی جانب سے قومی سطح پر احتجاج بھی کیا جاچکا ہے۔