سری نگر: شمالی ضلع بارہ مولہ کے ہر ترتھ سنگھ پورہ پٹن علاقے میں شبانہ آگ کی واردات میں ایک ہوٹل اور کریانہ سٹور خاکستر ہو گئے ہیں۔سرکاری ذرائع نے بتایا کہ منگل اور بدھ کی درمیانی شب سنگھ پورہ پٹن کے ہر ترتھ علاقے میں آگ نمودار ہوئی جس نے آناً فاناً ہوٹل عمارت اور دکان کو لپیٹ میں لے لیا۔انہوں نے بتایا کہ گیس سلنڈر پھٹ جانے سے آگ نے بھیانک رخ اختیار کیا تاہم فائر اینڈ ایمرجنسی اور مقامی لوگوں کی بروقت کارروائی کے نتیجے میں آگ کو مزید پھیلنے سے روک دیا گیا۔آتشزدگی کی اس واردات میں معشوق احمد خان ولد مشتاق احمد خان کا ہوٹل اور مشتاق احمد خان ولد عبدالرشید خان کا کریانہ سٹور خاکستر ہوا ہے ۔
جموں میں تیز رفتار ٹرک نے ایس پی او کو کچل ڈالا
جموں: جموں میں نروال بائی پاس کے نزدیک تیز رفتار ٹرک کی ٹکر سے سپیشل پولیس آفیسر (ایس پی او ) کی برسر موقع ہی موت واقع ہوئی ہے ۔سرکاری ذرائع نے بتایا کہ نروال جموں میں ڈیوٹی پر مامور سپیشل پولیس آفیسر کو تیز رفتار ٹرک نے زور دور ٹکر ماری جس وجہ سے وہ شدید طورپر زخمی ہوا۔معلوم ہوا ہے کہ آس پاس موجود دوسرے ساتھیوں نے ایس پی او کو علاج ومعالجہ کی خاطر نزدیکی ہسپتال منتقل کیا تاہم وہ وہاں پر جانبر نہ ہو سکا۔
