نئی دہلی۔11 جون(سیاست ڈاٹ کام) نیوزی لینڈکی خاتون کرکٹ ٹیم کی کپتان سوفی ڈیوائن نے کہا ہے کہ خواتین کی کرکٹ کو زیادہ دلکش بنانے کے لیے گیند کا سائز چھوٹا کر دینا چاہیے جبکہ ہندوستانی کھلاڑی جمیما روڈریگیز کے خیال میں پچ کو بھی چھوٹا کرنے سے کھیل میں تیزی آ سکتی ہے۔ دیگرکھیلوں کی طرح کرکٹ میں بھی خاتون ٹیموں کی عالمی مقبولیت میں اضافہ ہو رہا ہے ۔ تاہم مردوں کے میچوں کے مقابلے میں خواتین کی کرکٹ کو ابھی بھی ویسی مقبولیت نہیں مل سکی ہے ، جس کے لیے کرکٹ کا عالمی منتظم ادارہ انٹرنیشنل کرکٹ کونسل (آئی سی سی) کوششوں میں ہے ۔ کچھ شائقین کے مطابق خواتین کی کرکٹ سست ہوتی ہے اور اس میں ویسی جان نہیں ہوتی، جسے لوگ دیکھنا چاہتے ہیں۔ یہی بات فٹ بال اور فیلڈ ہاکی کے مقابلوں میں بھی کہی جاتی ہے ۔خواتین کے مقابلوں میں سنسنی اور تیزی کی کمی کو پورا کرنے کی خاطر مختلف اسپورٹس ادارے اقدامات کر رہے ہیں۔ اسی طرح آئی سی سی نے بھی ایک آن لان سیشن کا اہتمام کیا، جس میں خواتین کی کرکٹ کو زیادہ مقبول عام کرنے کے حوالے سے گفتگو کی گئی۔اس گفتگو میں شامل نیوزی لینڈ کی کرکٹ ٹیم کی کپتان سُوفی ڈیوائن نے کہا کہ میرے خیال میں ہم روایتی فارمیٹس میں پھنس کر رہ گئے ہیں۔ اس وجہ سے ہم نئے کھلاڑیوں کی آمد سے محروم ہوتے جا رہے ہیں۔ انہوں نے کہا کہ خواتین کی کرکٹ میں گیند کا سائز مزید چھوٹاکر دینا چاہیے اور پرکھنا چاہیے کہ یہ تجربہ کیسا رہتا ہے ۔یہ امر اہم ہے کہ خواتین کی عالمی کرکٹ میں استعمال کی جانے والی گیند کا سائز مردوں کے مقابلوں میں استعمال ہونے والی بال سے چھوٹا ہی ہے
لیکن ڈیوائن نے کہا ہے کہ اسے مزید چھوٹا کرنا چاہیے ۔ ناقدین کے مطابق اگرکرکٹ بال کو چھوٹا کر دیا جائے گا تو خواتین کی اس پر گرفت زیادہ ہوگی اور خواتین بولروں کو بال سوئنگ اور ٹرن کرنے میں زیادہ مدد مل سکے گی۔آئی سی سی کی طرف سے منعقد کیے گئے اس آن لائن ویبینارمیں اپنے خیالات کا اظہارکرتے ہوئے ہندوستانی کھلاڑی جمیما روڈریگیز نے کہا کہ کھیل کو فاسٹ اور زیادہ پرکشش بنانے کیلئے کرکٹ پچ کو بھی چھوٹاکردینا چاہیے ۔ انہوں نے کہا کہ چھوٹی پچ کی وجہ سے بولروں زیادہ تیز بولنگ کر سکیں گی اور بیٹس ومنس کو بھی اپنی ٹائمنگ بہتر بنانے میں مدد مل سکے گی۔19 سالہ ہندوستانی آل راؤنڈر نے مزید کہا کہ اگر اس طرح خواتین کی کرکٹ میں بہتری آ سکتی ہے تو اس بارے میں مزید بھی سوچا جا سکتا ہے ۔