حیدرآباد۔ پڑوسن لڑکی کو ہراساں کرنے والے ایک انٹر میڈیٹ طالب علم کو سائبر کرائم پولیس نے گرفتار کرلیا۔ شکایت کے بعد کارروائی کرتے ہوئے راچہ کنڈہ سائبر کرائم پولیس نے 18 سالہ وینکٹیش ساکن حیات نگر کو گرفتارکرلیا اور اس کے قبضہ سے ایک سیل فون ضبط کرلیا۔ ملزم نے ایک سال قبل پڑوسن لڑکی سے سیل فون کی خریداری کی تھی اور 9 ہزار روپئے میں سودا طئے ہوا اور ماہانہ اقساط پر رقم کی ادائیگی کا وعدہ کرتے ہوئے وینکٹیش نے لڑکی سے فون خریدلیااور چند ماہ پابندی سے رقم ادا کرنے کے بعد اس نے اقساط روک دیا جس پر لڑکی کی والدہ نے وینکٹیش پر رقم فوری ادا کرنے کیلئے دباؤ ڈالا اور برہمی ظاہر کی۔ اس بات سے سخت ناراض ملزم نے واٹس ایپ اکاؤنٹ تیار کیا اور VOIP کا استعمال کرتے ہوئے لڑکی کو ناقابل بیان پیامات روانہ کرنے لگا۔ چھ ماہ سے یہ سلسلہ جاری تھا۔ پولیس نے وینکٹیش کو گرفتار کرلیا۔
