حکومت نے ان 25 ہندوستانیوں کو سیکورٹی فراہم نہیں کی جو ہلاک ہوگئے : پرینکا گاندھی
نئی دہلی، 29 جولائی (ایجنسیز)آپریشن سندور پر لوک سبھا میں جاری بحث کے دوران کانگریس ایم پی پرینکا گاندھی واڈرا نے پہلگام دہشت گردانہ حملے میں ہلاک ہونے والوں کے نام گنائے۔ انہوں نے کہا کہ پہلگام میں مارے گئے 26 افراد میں سے 25 ہندوستانی تھے۔ یہ حکومت کی طرف سے سکیورٹی کوتاہی ہوئی۔ کانگریس ایم پی پرینکا گاندھی واڈرا نے پہلگام حملے کو افسوسناک قرار دیا۔ انہوں نے کہا کہ پہلگام میں جو کچھ ہوا، اس نے ہر ہندوستانی کے دل کو ٹھیس پہنچائی ہے۔ میں ایوان کو بتانا چاہتی ہوں کہ یہاں موجود ہر شخص کو سکیورٹی حاصل ہے۔ ہم جہاں بھی جاتے ہیں، سکیورٹی اہلکار ہمارے ساتھ جاتے ہیں، لیکن اس دن پہلگام میں 26 خاندان تباہ ہو گئے تھے۔ ان کے خاندان کے افراد مارے گئے جن میں 25 ہندوستانی بھی شامل تھے۔ کانگریس ایم پی نے حکومت پر سوال اٹھایا۔ انہوں نے کہا کہ پہلگام کی بیسران وادی میں مارے گئے تمام لوگوں کے لیے کوئی سکیورٹی نہیں تھی۔ چاہے آپ کتنے ہی آپریشن کرلیں، آپ اس حقیقت سے چھپ نہیں سکتے کہ آپ نے ان 25 ہندوستانیوں کو کوئی سکیورٹی فراہم نہیں کی۔ ایوان میں پرینکا گاندھی نے دہشت گردانہ حملے میں مارے گئے ہر فرد کے نام بتاتے ہوئے کہا، میں اس ایوان میں 25 ہندوستانیوں کے نام پڑھنا چاہتی ہوں، تاکہ یہاں بیٹھے ہر رکن کو لگے کہ وہ بھی ہماری طرح انسان تھے۔ وہ کسی سیاسی بساط کے پیادے نہیں تھے۔ وہ اس ملک کے بیٹے بھی تھے اور اس ملک کے شہید بھی۔ ہم سب کی ان کے خاندانوں کے تئیں جوابدہی ہے۔ ان کو بھی سچ جاننے کا حق ہے۔اس کے بعد جب پرینکا گاندھی ایوان میں پہلگام دہشت گردانہ حملے میں ہلاک ہونے والوں کے نام پڑھ کر سنانے لگیں تو ایوان میں نعرے بازی شروع ہوگئی۔ پرینکا گاندھی نے آپریشن سندور کا ذکر کرتے ہوئے کہا کہ اگر دہشت گردی کو ختم کرنا تھا تو پاکستان کو اقوام متحدہ کی انسداد دہشت گردی کمیٹی کا چیئرمین کیسے بنایا گیا۔ انہوں نے اسے سفارتی ناکامی قرار دیتے ہوئے سوال کیا کہ یہ کس کی ناکامی ہے؟