اقوام متحدہ انسانی حقوق کونسل میں دہشت گردی مسئلہ پر آئینہ دکھایا
نئی دہلی: اقوام متحدہ انسانی حقوق کونسل میں پاکستانی وزیر خارجہ کے الزامات پر ہندوستان نے کرارا جواب دیا ہے۔ رپورٹ کے مطابق ہندوستانی سفارت کار سیما پوجانی نے پاکستان کو دہشت گردی کے مسئلہ پر آڑے ہاتھوں لیا اور اسے آئینہ دکھانے کا کام کیا۔ سیما پوجانی نے کہا کہ آج پاکستان میں کوئی مذہبی اقلیت آزادی سے نہیں رہ سکتی اور نہ ہی اپنے مذہب پر عمل کر سکتی ہے۔ پاکستان کی پالیسیاں دنیا بھر میں ہزاروں شہریوں کی ہلاکت کی براہ راست ذمہ دار ہیں۔ پوجانی نے کہا کہ جموں و کشمیر اور لداخ یونین ٹیریٹری کے پورے علاقے ہندوستان کا حصہ تھے، ہیں اور ہمیشہ رہیں گے۔ پڑوسی ملک ہمیشہ ہندوستان کیخلاف پروپیگنڈا پھیلانے میں ملوث رہا ہے۔ یہ پاکستان کی غلط ترجیحات کی نشانی ہے۔ انہوں نے کہا کہ پاکستان غیر قانونی طور پر ہندوستانی سرزمین پر قبضہ کر رہا ہے۔ انہوں نے کہا کہ پہلے اپنا ملک سنبھالو۔
