پرتاپ گڑھ: پیس پارٹی کے قومی صدر ڈاکٹر ایوب سرجن نے کہا کہ پیس پارٹی اسمبلی حلقہ صوار میں مضبوطی کے ساتھ لڑ رہی ہے اور اس کو عوام کی مزید حمایت مل رہی ہے ۔ انہوں نے صوار اسمبلی حلقے میں میڈیا سے بات چیت کرتے ہوئے ان تاثرات کا اظہار کیا ۔ڈاکٹر ایوب سرجن نے کہا کہ آج تک جو بھی نمائندے منتخب ہوکر یہاں آئے ،انہوں نے علاقے کی ترقی کے لئے کچھ نہیں کیا ،بلکہ نعروں میں الجھا کر عوام کا ووٹ تو حاصل کیا ،مگر انہیں بنیادی سہولت تک دلانے سے قاصر رہے ۔صوار اسمبلی حلقہ کی پسماندگی کسی سے مخفی نہیں ہے ۔ یہاں قابض رہی سیاسی پارٹیوں کو عوام نے دیکھ لیا ہے ،جس کے سبب یہاں پیس پارٹی کے امیدوار کو عوام کی مزید حمایت مل رہی ہے ۔انہوں نے کہا کہ پیس پارٹی اگر یہاں سے کامیاب ہوتی ہے ،تو وہ عوام کے لئے وہ سبھی بنیادی کام کرے گی ،جس پر آج تک کسی سیاسی پارٹی نے توجہ نہیں دی ہے ۔ حالات یہ ہے کہ علاقے میں لوگوں کو صاف پینے کا پانی تک دستیاب نہیں ہے ۔ آزادی کے بعد سے اس علاقے میں سیاسی پارٹیوں نے ووٹ لینے کے لئے عوام کو سبز باغ تو دکھایا ۔،مگر کامیاب ہونے کے بعد ان کے دکھ درد کو محسوس نہیں کیا ۔پیس پارٹی عوام کے خوابوں کو ترجیحی بنیاد پر پورا کرے گی۔
ڈاکٹر ایوب نے کہا کہ پیس پارٹی مضبوطی کے ساتھ میدان میں ہے ،اس کی کامیابی یقینی ہے ۔