نئی دہلی : صدرجمہوریہ رامناتھ کووند نے 2020 کیلئے کئی شعبوں میں نمایاں خدمات انجام دینے والی شخصیات کو آج پدم ایوارڈس سے نوازا۔راشٹرپتی بھون میں منعقدہ شاندار تقریب میں وزیر اعظم نریندر مودی، مرکزی وزیر داخلہ امیت شاہ و دیگر معززین بھی موجود تھے۔صدر جمہوریہ نے سینئر سوشلسٹ لیڈر اور سابق وزیر دفاع جارج فرنانڈیز، سابق وزیر خزانہ ارون جیٹلی اور سابق وزیر خارجہ سشما سوراج کو بعد از مرگ ملک کا دوسرا سب سے بڑا شہری اعزاز پدم وبھوشن سے نوازا۔ ماریشس کے سابق صدر ووزیر اعظم انیرودھ جگناوتھ کو بھی پدم وبھوشن سے نوازا گیا۔ ڈبل اولمپک میڈلسٹ بیاڈمنٹن اسٹار پی وی سندھوکو پدم بھوشن عطا کیا گیا۔ کلاسیکی گلوکار چننولال مشرا، باکسر میری کوم اور پجاور مٹھ کے سابق سربراہ آنجہانی وشویش تیرتھ سوامی کو بھی پدم وبھوشن سے نوازا گیا۔پاکستانی نژاد گلوکار اور کئی صلاحیتوں کے حامل عدنان سمیع کو پدم شری ایوارڈ دیا گیا ۔ کووندنے 2021 ء کیلئے بھی 119 شخصیات کو پدم ایوارڈ سے نوازا ۔
