اسلام آباد: مردان کی عدالت نے پی ٹی آئی رہنما اسد قیصر کی درخواست ضمانت منظور کرکے رہائی کا حکم جاری کردیا۔ جیونیوز کے مطابق سابق اسپیکر قومی اسمبلی اسد قیصر کو چارسدہ پولیس نے سانحہ 9 مئی کے مقدمے میں گرفتار کیا تھا اور 24 نومبر کو انہیں سیشن کورٹ مردان میں پیش کرنے پر عدالت نے پولیس کی جانب سے ان کے جسمانی ریمانڈ دینے کی استدعا مسترد کرتے ہوئے سینٹرل جیل بھیج دیا تھا۔ جمعہ کو سابق اسپیکر کی درخواست ضمانت وکلا کے دلائل مکمل ہونے کے بعد عدالت نے فیصلے کے لیے 2 دسمبر کی تاریخ مقرر کی تھی۔ ڈسٹرکٹ اینڈ سیشن کورٹ کے جج محمد زیب خان نے فیصلہ سناتے ہوئے اسد قیصر کی ضمانت منظور کی اور حکم دیا کہ اگر وہ کسی اور مقدمہ میں ملوث نہ ہو تو انہیں ضمانت پر رہا کردیا جائے ۔
