اسلام آباد: پاکستان تحریک انصاف کے نائب صدرنشین شاہ محمود قریشی نے پی ڈی ایم کا 31 دسمبر کا الٹی میٹم مسترد کرتے ہوئے کہا ہیکہ وزیراعظم عمران خان مستعفی نہیں ہونگے اور اگر پی ڈی ایم سنجیدہ ہے تو 31 دسمبر تک ان کے استعفے اسپیکر قومی اسمبلی کے پاس پہنچنے چاہئیں۔ وزیر خارجہ شاہ محمود قریشی نے اسلام آباد میں پریس کانفرنس کرتے ہوئے کہا کہ پی ڈی ایم کہتی ہیکہ حکومت سے گفت و شنید کا وقت جاچْکا، دھمکیوں سے تو بات نہیں چلے گی، یہ رویہ جمہوریت کو نقصان پہنچا سکتا ہے تاریخ سے سبق سیکھئے، بلاول نے اگر سیکھنا ہے تو اپنے نانا سے سیکھ لیجیے، بھٹو صاحب نے اپنے خلاف اٹھنے والی تحریک کو کہا آئیے بیٹھیے بات کیجیے، سیاست میں ہٹ دھرمی نہیں ہوتی آپ ہمیشہ راستہ تلاش کرتے ہیں۔شاہ محمود قریشی نے کہا کہ لاہور ڈکلیریشن سامنے آیا جس میں بہت سی باتیں کی گئیں کہ 31جنوری تک وزیراعظم مستعفی ہوجائیں، ہم آپ کے الٹی میٹم کو مسترد کرتے ہیں، وزیراعظم مستعفی نہیں ہونگے، ہمیں ایک کروڑ 70لاکھ ووٹ ملے ہیں۔ وزیراعظم کیوں مستعفی ہوجائیں؟ عمران خان کہہ رہے ہیں کہ اسمبلیوں کو تحلیل نہیں کیا جائے گا۔
