سری نگر:پیپلز ڈیموکریٹک پارٹی (پی ڈی پی) کی خواتین ونگ نے ضلع مجسٹریٹ سری نگر سے پارٹی صدر اور سابق وزیر اعلیٰ محبوبہ مفتی کے ساتھ ملاقات کرنے کے لئے اجازت طلب کی ہے ۔بتادیں کہ محبوبہ مفتی سال گذشتہ کے پانچ اگست سے مسلسل نظر بند ہیں۔پی ڈی پی کے ایک ترجمان نے بتایا کہ پارٹی کی خواتین ونگ کی صدر سفینہ بیگ نے ماہ رواں کی پانچ تاریخ کو ضلع مجسٹریٹ سری نگر ڈاکٹر شاہد اقبال چوہدری کے نام ایک مکتوب ارسال کیا ہے جس میں ان سے پارٹی صدر محبوبہ مفتی جو گپکار میں اپنی رہائش گاہ، جس کو سب جیل قرار دیا گیا ہے ، پر نظر بند ہیں، کے ساتھ ملاقات کرنے کے لئے اجازت طلب کی گئی ہے ۔مکتوب میں کہا گیا ہے : ‘پی ڈی پی صدر محبوبہ مفتی پانچ اگست 2019 سے مسلسل نظر بند ہیں اور ہماری بارہا کی درخواستوں کے باوجود ہمیں ان کے ساتھ ملاقات کرنے کی اجازت نہیں دی جا رہی ہے جس کی وجہ سے ہم نہ ہی آپ کی خیر وعافیت معلوم کر سکتے ہیں اور نہ ہی پارٹی کے امور پر آپ کے ساتھ تبادلہ خیال کر سکتے ہیں’۔
