چار دنوں میں کورونا کے ایک لاکھ سے زیادہ معاملے

چہارشنبہ سے کوویڈ مریضوں میں ریکارڈ اضافہ ۔ صحت یاب مریضوں کی تعداد بھی بڑھی
نئی دہلی: ملک میں کورونا وائرس کے تیزی پھیلنے کے درمیان صرف چار دنوں میں متاثرہ افراد کی تعداد ایک لاکھ سے زیادہ کے اضافے کے ساتھ 8.21 لاکھ ہوگئی ہے ۔وزارت صحت و خاندانی بہبود کی طرف سے ہفتہ کے روز جاری اعداد و شمار کے مطابق گزشتہ 24 گھنٹے کے دوران ملک بھر میں کورونا وائرس کے 27,114 معاملے رپورٹ ہوئے ہیں، جو اب تک ایک دن میں سامنے والی سب سے بڑی تعداد ہے ۔ جمعہ کے روز 26,506، جمعرات کو 24,879 اور بدھ کے روز 22,752 معاملے رپورٹ ہوئے تھے ۔ اس طرح چار دن میں 1,01,251 معاملے رپورٹ ہوئے ہیں اور اس طرح ملک میں متاثرہ افراد کی کل تعداد 7,19,665 سے بڑھ کر 8,20,916 ہوگئی ہے ۔ان چار دنوں میں مرنے والوں کی تعداد 1،963 کے اضافے کے ساتھ 22,123 ہو گئی۔ کورونا وائرس سے بدھ کے روز 482، جمعرات کو 487، جمعہ کو 475 اور ہفتہ کے روز 519 لوگوں کی موت ہوگئی۔تاہم، اس عرصے میں راحت کی بات یہ ہے کہ کورونا وائرس سے صحت یاب ہونے والوں کی تعداد میں بھی بڑا اضافہ ریکارڈ کیا گیا ہے اور 75 ہزار سے زیادہ افراد صحت یاب ہوچکے ہیں۔ منگل کے روز تک جہاں وائرس سے نجات پانے والے افراد کی تعداد 439948 تھی، ہفتہ تک یہ تعداد 75,438 بڑھ کر 5,15,386 ہوگئی ہے ۔