حیدرآباد۔ 18 فروری (پریس نوٹ) مرکزی رویت ہلال کمیٹی صدر مجلس علماء دکن کا ماہانہ اجلاس بضمن رویت ہلال ماہ رمضان المبارک 1447ھ زیر نگرانی مولانا مفتی خلیل احمد رکن معزز صدر مجلس علماء دکن آج 18 فروری 2026ء بروز چہارشنبہ 6 بجے شام حسینی بلڈنگ معظم جاہی مارکٹ میں منعقد ہوا۔ شہر میں مطلع صاف رہا اور ملک کے مختلف مقامات جیسے جھارکھنڈ، بہار، اورنگ آباد سے چاند نظر آنے کی اطلاعات موصول ہوئیں۔ لہذا تحت احکام شرعیہ مرکزی رویت ہلال کمیٹی صدر مجلس علماء دکن اعلان کرتی ہیکہ 19 فروری 2026ء جمعرات کو یکم؍ رمضان المبارک ہوگی۔ اجلاس میں مولانا مفتی خلیل احمد، مولانا سید محمود بادشاہ قادری زرین کلاہ، مولانا سید محمد اولیا حسینی قادری مرتضی پاشاہ، مولانا سید مفتی صغیر احمد نقشبندی، مولانا سید آل مصطفی قادری الموسوی علی پاشاہ، مولانا سید شیخن احمد قادری شطاری کامل پاشاہ، مولانا سید وصی اللہ قادری، مولانا مشہود احمد قادری، مولانا سید قادر محی الدین قادری جنید پاشاہ اور جناب قاضی سید نور اللہ فاروق عارفی نے شرکت فرمائی۔
شیعہ علماء کا بیان
٭٭ سید علی اصغر جعفری صاحب کی اطلاع کے مطابق کل ہند شیعہ علماء و ذاکرین نے اعلان کیا ہے کہ چاند نظر آگیا لہذا جمعرات 19 فروری 2026 ء کو یکم رمضان المبارک 1447ھ ہوگی۔ مولانا ڈاکٹر سید نثار حسین حیدرآقا، مولانا رضا عباس خاں، مولانا مہدی حسن بہشتی، مولانا سید جلال حیدر، مولانا سید جواد عابدی اور مولانا سید محب عابد نے اس کی تصدیق کی ہے۔