حیدرآباد /21 اپریل ( راست ) مرکزی رویت ہلال کمیٹی صدر مجلس علماء دکن کا ماہانہ اجلاس بضمن رویت ہلال ماہ شوال المکرم 1444ھ زیر نگرانی حضرت مولانا مفتی محمد خلیل احمد معزز رکن صدر مجلس علماء دکن آج شام حسینی بلڈنگ معظم جاہی مارکٹ میں منعقد ہوا ۔ شہر میں مطلع ابرآلود تھا ۔ چاند نظر نہیں آیا ۔ اطراف بلدہ کے کئی مقامات سے بھی چاند نظر نہیں آنے کی اطلاعات ملی ۔ البتہ کھمم ، نیلور ، اورنگ آباد ، ممبئی ، بلہاری ، نلدرگ ، پٹنہ ، رانچی ، گجرات ( بھڑوچ ) مالیگاؤں ، پورنیہ اور حاجی پور کے علاوہ بیشتر مقامات سے عام رویت کی اطلاعات ملی ۔ لہذا تحت احکام شرعیہ مرکزی رویت ہلال کمیٹی صدر مجلس علماء دکن اعلان کرتی ہے کہ بتاریخ 22 اپریل بروز ہفتہ یکم شواب المکرم 1444ھ ہوگی ۔ اس اجلاس میں حضرت مولانا مفتی محمد خلیل احمد ، حضرت مولانا سید حسن ابراہیم حسینی سجاد پاشاہ ، حضرت مولانا سید محمود بادشاہ قادری زرین کلاہ ، حضرت مولانا سید محمد اولیاء حسینی مرتضی پاشاہ ، حضرت مولانا سید آل مصطفی قادری الموسوی علی پاشاہ ، حضرت مولانا سید شیخین احمد قادری الشطاری کامل پاشاہ ، حضرت مولانا ڈاکٹر سید علی حسینی قادری علی پاشاہ نے شرکت کی ۔
شیعہ علماء کا بیان
٭٭سید علی اصغر جعفری کی اطلاع کے مطابق کل ہند شیعہ مجلس علماء و ذاکرین نے اعلان کیا کہ آج چاند نظر آگیا ۔ لہذا 22 اپریل 2023ء ہفتہ عیدالفطر ہوگی ۔ یعنی یکم شوال المکرم 1444ھ ہوگی ۔ اس کی تصدیق حسب ذیل علماء کرام نے کی ۔ مولانا سید نبی حسن زیدی ، مولانا ڈاکٹر سید نثار حسین حیدر آقا ، مولانا رضا عباس خان ، مولانا سید جواد عابدی اور مولانا سید محب عابد ۔
