سرن۔18؍اکتو بر ( ایجنسیز) بہار کی مدھورا اسمبلی سیٹ سے ایل جے پی رام ولاس پاسوان کی امیدوار کا پرچۂ نامزدگی منسوخ کر دیا گیا ہے۔ سیما سنگھ نے جمعہ کو صرف ایک دن پہلے ہی اپنا پرچۂ نامزدگی داخل کیا تھا۔ سیما سنگھ کی نامزدگی کی منسوخی سے این ڈی اے کو بڑا دھکہ لگا ہے۔ اب اس سیٹ پر مقابلہ آر جے ڈی اور جن سوراج کے درمیان ہے۔ڈپٹی کمشنر آف پولیس نے نامزدگی کی منسوخی سے متعلق کہاکہ سیما سنگھ کے پرچۂ نامزدگی میں غلطی کی وجہ سے منسوخ کر دیا گیا ہے۔سیما سنگھ بھوجپوری فلم انڈسٹری کا ایک جانا پہچانا چہرہ ہیں اور فلموں میں اپنے ڈانس کیلئے مشہور ہیں۔ سیما سنگھ ایل جے پی رام ولاس کی ریاستی یوتھ جنرل سکریٹری ہیں۔سیما سنگھ کیخلاف 2024 کے لوک سبھا انتخابات کے دوران ضابطۂ اخلاق کی خلاف ورزی کا مقدمہ درج کیا گیا تھا۔ اس نے سرکاری اجازت کے بغیر شیخ پورہ میں ہولی کا اجتماع منعقد کیا تھا۔
