قاہرہ: مصر کے دارالحکومت قاہرہ کے چرچ میں لگی آگ میں پھنسے افراد کو بچانے والا مسلمان نوجوان اسپتال میں زیر علاج ہے۔گزشتہ دنوں قاہرہ کے چرچ میں آتشزدگی کا واقعہ پیش آیا تھا، جس کے نتیجے میں 41افراد ہلاک جبکہ درجنوں زخمی ہوگئے تھے۔ عرب میڈیا کے مطابق چرچ میں آتشزدگی کے بعد نوجوان محمد یحییٰ ابو مروان نے اپنی جان پر کھیل کر متعدد افراد کو آگ سے بچایا اور اس کوشش میں وہ خود زخمی بھی ہوگئے۔ابومروان کی پاؤں کی ہڈی ٹوٹ گئی تھی اور اب وہ اسپتال میں زیر علاج ہیں۔ نوجوان نے میڈیا سے گفتگو کرتے ہوئے بتایا کہ وہ گرجا گھر کے قریب ہی رہتے ہیں، اتاور کی صبح گھر سے نکلا تو دیکھا گرجا گھر میں ہولناک آگ لگی ہوئی اور اندر سے لوگ بچاؤ بچاؤ کی صدائیں لگا رہے ہیں۔لوگوں کی آوازیں سن کر اندر موجود شہریوں کو بچانے کے لیے آگ میں کود پڑا۔ محمد ابو مروان نے 5 بچوں کو گرجا گھر سے باہر نکالا ہے جبکہ متعدد مرد اور خواتین کی نکلنے میں مدد کی۔ عینی شاہدین کا کہنا تھا کہ ابومروان جب آگ میں محصور ایک بزرگ کو بچانے کے لیے گئے تو انہیں اٹھاتے وقت وہ پھسل گئے اور پیر میں شدید چوٹ کے باعث زخمی ہو گئے۔
