چمپئنز ٹرافی فائنل ہند ۔ آسٹریلیا ہوگا، روی شاستری کی پیش قیاسی

   

ممبئی: سابق کرکٹر اور معروف کمنٹیٹر روی شاستری نے آئی سی سی چمپئنز ٹرافی کے فائنل سے متعلق پیش قیاسی کی ہے۔ شاستری نے آئی سی سی ریویو میں اظہار خیال کرتے ہوئے کہا کہ بھارت اور آسٹریلیا وہ دو ٹیمیں ہیں جو چمپئنز ٹرافی 2025 کا فائنل کھیل سکتی ہیں۔ انہوں نے مختصر گفتگو میں کہا کہ ہندوستان اور آسٹریلیا میگا ٹورنامنٹس میں ہمیشہ ہی شاندار کارکردگی کا مظاہرہ کرتے ہیں، تاریخ دیکھی جائے تو یہ دونوں فائنل کیلئے کوالیفائی کرسکتے ہیں۔ شاستری نے کھلاڑیوں کے معیار کا بھی ذکر کیا جو اس وقت دونوں ٹیموں کے پاس ہیں۔ اس کے علاوہ 62 سالہ سابق کرکٹر نے جنوبی افریقہ اور انگلینڈ سے متعلق کہا کہ یہ دونوں وہ ٹیمیں ہوسکتی ہیں جو سیمی فائنل کھیلیں گی۔ واضح رہے کہ اسی قسط میں گفتگو کرتے ہوئے سابق آسٹریلیائی کپتان رکی پونٹنگ نے بھی آسٹریلیا اور انڈیا کے درمیان آئی سی سی چمپئنز ٹرافی کا فائنل میچ ہونے کی پیش قیاسی کی تھی لیکن ساتھ ہی انہوں نے یہ بھی خبردار کیا تھا کہ پاکستانی ٹیم دونوں ٹیموں کیلئے چیلنج بنے گی۔ ٹورنامنٹ کا آغاز 19 فروری سے پاکستان اور یو اے ای میں ہونے جارہا ہے جس میں آٹھ ٹیمیں ایک دوسرے کے مد مقابل ہوں گی۔