نئی دہلی، 28نومبر (سیاست ڈاٹ کام) چٹ فنڈ اسکینڈل پر لگام لگانے او ر چھوٹے سرمایہ کاروں کی سیکورٹی کے لئے چٹ فنڈ ترمیمی بل 2019پر جمعرات کو پارلیمنٹ کی مہر لگ گئی۔راجیہ سبھا نے چٹ فنڈ قانون1982میں ترمیم لانے والے اس بل کو صوتی ووٹ سے منظور کردیا۔ لوک سبھا اس بل کو پہلے ہی پاس کرچکی ہے ۔ وزیر مملکت برائے خزانہ انوراگ ٹھاکر نے دو دن پہلے شروع ہوئی بحث کے بعد آج تقریباََ ایک گھنٹے تک چلی بحث کا جواب دیتے ہوئے کہاکہ وزیراعظم نریندر مودی نے چھوٹے اور غریب سرمایہ کاروں کو پیش نظر رکھتے ہوئے جامع مالیاتی نظام بنانے کی کوشش کی ہے ۔اس بل میں انفرادی سرمایہ کارکے لئے ایک لاکھ روپے سے بڑھاکر تین لاکھ روپے تک رقم جمع کرنے کا التزام کیا گیا ہے جبکہ کمپنیوں کے لئے 13لاکھ سے بڑھا کر 18 لاکھ روپے کی رقم جمع کرنے کا التزام کیا گیا ہے ۔ اس کے علاوہ فورمین کا کمیشن پانچ فیصد سے بڑھاکر سات فیصد کرنے کا التزام کیا گیا ہے ۔
