واشنگٹن، 7 اگست (یو این آئی) امریکی صدر ڈونلڈ ٹرمپ نے کہا ہے کہ چپس اور سیمی کنڈکٹرز پر 100 فی صد ٹیرف لگایا جائے گا۔میڈیا کے مطابق صدر ٹرمپ نے کہا ہے کہ امریکہ مائیکرو چپس اور سیمی کنڈکٹرز کی درآمدات پر تقریباً 100 فی صد ٹیرف لگانے جا رہا ہے ، تاہم ان کمپنیوں کو چھوٹ حاصل ہوگی جو امریکا میں مینوفیکچرنگ کر رہی ہیں یا ایسا کرنے کا عہد کر چکی ہیں۔ٹرمپ نے کہا اگر آپ سیمی کنڈکٹرز اور مائیکرو چپس امریکا میں بنائیں گے تو کوئی چارج نہیں ہوگا، ایک سال پہلے امریکہ کو دیوالیہ کہا جاتا تھا لیکن آج کئی کمپنیاں امریکہ میں اربوں ڈالر کی سرمایہ کاری کررہی ہیں۔ٹرمپ کا یہ اقدام مینوفیکچرنگ کو امریکہ میں واپس لانے کی کوششوں کا حصہ ہے ۔ انھوں نے یہ اعلان بھی کیا ہے کہ ایپل اب ایک نیا در وا کر رہی ہے اور امریکی مارکیٹ میں اپنی سرمایہ کاری میں 100 ارب ڈالر کا اضافہ کر رہی ہے ۔انھوں نے اوول آفس میں صحافیوں کو بتایا کہ ایپل جیسی کمپنیوں کیلئے کوئی چارج نہیں ہوگا، تاہم امریکی صدر نے خبردار کیا کہ کمپنیوں کو امریکہ میں فیکٹریوں کی تعمیر کے وعدوں سے دست بردار ہونے کی کوشش نہیں کرنی چاہیے ۔ اگر انہوںنے ایسا کیا تو ہم آپ سے یہ محصولات پیچھے کی تاریخوں سے جا کر وصول کر لیں گے ۔واضح رہے کہ ٹیرف کے رد عمل میں فلپائن کے سیمی کنڈکٹر انڈسٹری نے کہا ہے کہ ٹرمپ کا منصوبہ ان کے ملک کے لیے ’تباہ کن‘ ہوگا۔ جب کہ عالمی سطح پر چپ ٹیسٹنگ اور پیکجنگ کے ایک بڑے کھلاڑی ملائیشیا کے وزیر تجارت ٹینگکو ظفرالعزیز نے پارلیمنٹ کو متنبہ کیا کہ ان کے ملک کو امریکہ کی ایک بڑی مارکیٹ سے محروم ہونے کا خطرہ ہے ۔
