نئی دہلی،8اگست (یواین آئی) اطلاعات و نشریات کی وزارت کے پبلیکیشنز ڈویژن نے ہندوستانی کرداروں سے متعلق مواد کی تخلیق کو فروغ دینے اور نوجوان قارئین تک ثقافتی طور پر جڑی کہانیوں کو پہنچانے کے اپنے عزم کے تحت آج یہاں تازہ ترین چھوٹا بھیم مزاحیہ سیریز کا آغاز کیا۔ پبلیکیشنز ڈویژن کے پرنسپل ڈائریکٹر جنرل بھوپیندر کینتھولا نے بھارت منڈپم میں سیریز کی لانچنگ تقریب سے کہا کہ جو کہانیاں ہم اپنے بچوں کو سناتے ہیں ان کا ہندوستانی رابطہ ہونا چاہیے ۔ ہمارے جیسے ملک میں، جہاں ہمارے دادا دادی ہندوستانی کرداروں کے ساتھ کہانیاں سناتے تھے ، پبلی کیشنز ڈویژن کہانی سنانے کی ان روایات کو یاد کیے بنا نہیں رہ سکتا۔انہوں نے کہا کہ ہم ان کے بارے میں مادری زبان میں جتنی زیادہ بات کریں گے ہماری نئی نسل کی ترقی کی کہانی اتنی ہی گہری ہوتی جائے گی۔ انہوں نے یہ بھی کہا کہ ہندوستانی کہانیاں اقدار اور ہمت کا پیغام دیتی ہیں اس لیے انہیں ہر کونے تک پہنچنا چاہیے ۔وزارت کے مطابق، پبلیکیشنز ڈویژن نے چھوٹا بھیم کامک سیریز کی نقاب کشائی کی ہے تاکہ ہندوستانی مواد کی تخلیق کو فروغ دیا جا سکے اور ملکی کہانی سنانے کی روایات کو تقویت ملے ۔
