وزیر اعظم مودی کو سونیاگاندھی کا مکتوب ‘ معیشت پر اظہار تشویش
نئی دہلی ۔ 25 ؍ اپریل (سیاست ڈاٹ کام) کانگریس کی صدر سونیاگاندھی نے ہفتہ کو وزیراعظم نریندرمودی کے نام ایک مکتوب میں درخواست کی کہ کورونا وائرس کے اثرات سے بری طرح زد میں آنے والی چھوٹی اور متوسط صنعتوں اور کاروباری اداروں کے لئے ایک امدادی پیاکیج کا اعلان کریں ۔ انہوں نے ان صنعتوں اور تجارتی اداروں کی بحالی کے لئے چند تجاویز بھی پیش کی ہیں۔ سونیا گاندھی نے گھریلو چھوٹی اور متوسط صنعتوں او ر تجارتی اداروں کے لئے ایک لاکھ کروڑ روپئے مالیتی اجرت پر مبنی پیاکیج اور قرض کی ضمانت کے لئے اہم اعلانات کرنے کی درخواست بھی کی ۔ انہوں نے کہا کہ گھریلو اور چھوٹی صنعتوں کو لاک ڈاؤن کے سبب یومیہ 30,000 کروڑ روپئے کا خسارہ ہو رہا ہے ۔ اس مسئلہ کو اگر نظرانداز کر دیا جائے گا تو معیشت پر اس کے سنگین اثرات مرتب ہوسکتے ہیں ۔ سونیاگاندھی نے کہا کہ ایک ایسے وقت جب سارا ملک کورونا وائر س کے خلاف لڑائی جاری رکہا ہوا ہے ۔ اس دوران معیشت کے بارے میں فکر و تشویش کا اظہار بھی لازمی ہے ۔
