نئی دہلی ۔ 13 نومبر (سیاست ڈاٹ کام ) ہندوستانی فاسٹ بولر دیپک چہر نے تین دن کے وقفے سے ٹی ٹوئنٹی کرکٹ میں دوسری ہیٹ ٹرک کرلی۔ نوجوان کرکٹر دیپک چہر کو عمدہ بولنگ کی وجہ سے ہندوستان کی ٹی ٹوئنٹی ٹیم کا حصہ بنایا گیا تھا۔ بنگلہ دیش کے خلاف تین میچوں کی سیریز کے تیسرے اور فیصلہ کن میچ میں چہر بنگلہ دیشی بیٹسمین پر قہر بن کر برسے اور صرف 7 رنز دے کر 6 وکٹیں لے کر اپنی ٹیم کو 2-1سے سیریز میں کامیابی بھی دلوادی۔ چہر نے نہ صرف بین الاقوامی ٹی ٹوئنٹی کرکٹ میں بہترین بولنگ کا ریکارڈ توڑا بلکہ انہوں نے اس میچ میں ہیٹ ٹرک بھی مکمل کی تھی۔ بنگلہ دیشی کھلاڑیوں شفیع الاسلام، مستفیض الرحمٰن اور امین الاسلام کو آؤٹ کرکے بین الاقوامی کیریئر میں اپنی پہلی ہیٹ ٹرک کی تھی۔ تاہم 10 نومبر کو اپنے اس کارنامے کے بعد ایک مرتبہ پھر انہوں نے یہ کارنامہ انجام دے دیا۔ اس مرتبہ یہ بین الاقوامی میچ نہیں بلکہ ایک مقامی ٹی ٹوئنٹی ایونٹ سید مشتاق علی ٹرافی تھا جو راجستھان اور وداربھا کے درمیان کھیلا گیا تھا۔ تھیرو ونانتھاپورم میں وداربھا کے خلاف کھیلے جارہے میچ میں چہر نے راجستھان کی نمائندگی کرتے ہوئے درشن نال کنڈے، شری کانت واگھ اور اکشے واڈکر کو آؤٹ کرکے ڈومیسٹک ٹی ٹوئنٹی میں بھی اپنی ہیٹ ٹرک مکمل کی۔
