کولکاتا : مغربی بنگال کی وزیر اعلی ممتا بنرجی نے آج کہا ہے کہ وہ اگلے ہفتے دہلی کے سفر کے دوران وزیر اعظم نریندر مودی سے ملاقات کریں گی۔ مئی میں بنگال اسمبلی انتخابات کے نتائج کے بعد ممتا بنرجی اور وزیرا عظم کے درمیان بالمشافہ یہ دوسری ملاقات ہوگی۔ اسمبلی انتخابات کے دوران دونوں لیڈروں کے درمیان تلخ بیانات اور تبصرے ہوئے تھے۔ ممتابنرجی نے کہا کہ میں اگلے ہفتے دو تین دن کے لئے دہلی جاؤں گی۔ اگر مجھے وقت ملتا ہے تو میں صدر جمہوریہ سے ملاقات کروں گی۔ وزیر اعظم نے مجھے وقت دیا ہے۔ میں ان سے ملوں گی۔ انہوں نے مرکزی حکومت پر مختلف معاملات جیسے میڈیا ہاوسیز پر انکم ٹیکس کے چھاپوں ، پیگاسس اسنوپنگ اسکینڈل معاملے میں مرکزی حکومت کی سخت تنقید کی ہے۔ ممتا بنرجی نے کہا کہ امریکہ میں 1972 ء کے واٹر گیٹ اسکینڈل کے مقابلے میں پیگاسس اسنوپنگ اسکینڈل کہیں بڑا ہے۔ اس کے ساتھ ہی میڈیا ہاؤسیز پر انکم ٹیکس کے تازہ ترین چھاپوں پر تبصرہ کرتے ہوئے انہوں نے کہا کہ ملک انتہائی ہنگامی صورتحال سے دوچار ہے۔ ممتا بنرجی نے کہا کہ پیگاسس واٹر گیٹ سے بڑا ہے۔ ایمرجنسی سے بڑی ایمرجنسی۔ سوپر ایمرجنسی ہے۔ یہ کب تک چل سکتا ہے؟۔ ممتا بنرجی نے کہا کہ تمام ایجنسیوں کو پیگاسس میں تبدیل کردیا گیا ہے۔ حکومت اپنے وزرا پر یقین نہیں رکھتی ہے۔ صحافیوں کا بھی فون ٹیاپ کیا جارہا ہے۔
